'O nievo
Rocco Galdieri (Rambaldo)
'O NIEVO
(Bozzetto drammatico dialettale)
---
NAPOLI
TIPOGRAFIA EDITRICE BIDERI
S. Pietro a Majella, 17
1919
'O NIEVO
(Bozzetto drammatico dialettale)
---
Rocco Galdieri (Rambaldo)
'O NIEVO
(Bozzetto drammatico dialettale)
---
NAPOLI
TIPOGRAFIA EDITRICE BIDERI
S. Pietro a Majella, 17
1919
Proprietà letteraria
'O NIEVO
(Bozzetto drammatico dialettale)
— —
'O carcerato parla a 'o carceriere
– No, nun dicite ca i’ so’ comme a ll’ate,
pecchè i’ nun dico ca songo ’nnucente…
io ve dico: si stongo carcerate,
nun ve credite ca so’ malamente.
erite: si tenesse ’a penna ’e mmane,
i’ screvesse ’nu libbro ’e tutto ’o fatto…
Che vo’ di’ ch’aggio acciso ’o Nase ’e cane?
Isso s’’o ’mmeretava e i’ ’nce aggiu fatto!
’è?… Vuie scappate?… Ve fa ’mpressione
a sentì ca ’sti mmane hannu luvate
’n’ommo d’’o munno?… Embè… sentite bbuone
che ve dico… Sentite e…. nu’ scappate.
Io nun saccio si vuje tenite sore,
’na femmena, che ssa’, ca v’appartene;
Io nun saccio si vuje tenite ’o core
ca ’ntenne ’o bbene… mme capite: ’O bbene!…
Ca nuje mettimme, ca ’nu tale e quale
omme ’e niente, ’nu ’nfame traritore
s’arrobba ’o bene vuosto ’o cchiù carnale.
senza curtiello, ve ferisce ’o core…
ah!… vuje, ca site n’ommo e ca tenite
’annore ’nfaccia, vuje… — parlate… — a chi
ve fa ’st’affronto, niente le facite?
No, nun facite comme aggiu fatt’i’!
Embè?!…
…Comm’a ’na sora,
I’ ’aggio vuluta bbene,
no comm’a ’nnammurata!
Mo’, se po’ di’, ch’’a voglio bbene ancora!…
Io ’o ssaccio… io mme n’addono!…:::E lle dicesse: Viene,
si tu si’ stata ’ngrata,
truorne a ddu me, nun ’mporta, io te perdono.
Turnasse ’a vita antica
e nun penzasse maje
p’essa se so’ spurcate
’sti mmane meje, ’ncallute d’’a fatica!
Chi m’ha mise ’e ccatene?
Pe’ cchi sto dint’e guaje?
Pecchè sto carcerato?
Nun 'o penzasse, pecchè... 'a voglio bbene!
E si vuje, pe' 'nu poco sulamente,
'a tenisseve mente
dint'a chill'uocchie bella 'e passione,
mme disseve raggione!...
Pecchè, chill'uocchie, ca mme dann' 'a morte
fanne carè 'o cchiù fforte...
Traseno, comme fossene pugnale,
ma senza farve male...
Doppo po'... ve rummane 'na ferita,
ca fernesce c' 'a vita!
Basta, —pe' nun purtà cchiù a lluogo 'a cosa,
Doppo tre anne d'ammore cujeto,
'na sera, appuro ca fuje vista Rosa
cu 'n'ommo, 'ncopp' 'e vicule 'e Tuleto...
Rosa, capite? — 'a 'nnammurata mia!
Me venette 'nu triemmulo e 'na foia;
— i' stev' int' 'a cantina 'a Vecaria, —
lass'all'amice, e corro 'a casa soja...
(I' l'avesse sceppate 'o core 'a pietto!)
Tras' 'int' 'o vascio; 'a mamma tann'asceva...
— Rosa addò sta? — Pecchè?... sta dint' 'o lietto
Corro vicin' 'o lietto...
Essa durmeva,
(Quanno 'o Signore vo' scanzà 'nu guaie!)
c' 'o pizzo a rriso e ch' 'e braccelle a fora...
accussì bella!... ('A mana s'acalaje)
Bella accussì nun l'êva vista ancora!
'Ncopp' 'a spalla reritta, po' teneva
'nu nievo, niro comme 'a ciucculata...
('n' 'ata bellezza ch'i' nun canusceva!)
Io me scurdaje ca chella era 'na 'ngrata,
e 'a guardava, tremmanne 'int' 'e ddenocchie...
Quanta pareva bella! m'acalaje,
e lle dette 'nu vaso 'ncopp'a ll'uocchie...
(Era 'juto p'accìrere e... a vasaje!)
Po' me n'ascette fora,
e i mo', ca nu' chiagnette
nemmanco quanno mammema murette,
me ll'allicordo ancora,
chella sera... chiagnette!
Passajene due tre ghiuorne,
senza vederce cchiù...
'Nu juorne 'nce 'ncuntrajeme.
essa dicette: « Tu
« nun si' chill' 'e na vota,
« Va trova che sarrà!....
I' nun 'a rispunnette...
c' 'a rispunnev' a ffa?!
E 'a sera, 'int' 'a cantina,
stette senza parlà,
c'amice... n'atu ppoco
me fosse jut'a cuccà!
Quante trase 'na chiorma
'e ggente 'e malavita:
Ciccio 'o ngrese, 'o Cannone,
Pascale 'o spilacita...
Bona sera!... Salute!...
'nce stennetteme 'e mmane...
(Steva, 'nzieme cu lloro,
Turillo 'O Nase 'e Cane).
Se cumbina 'nu tuocco;
i' resto fore juoco.
— Cher'è, vuje nun ghiucate?
— No, joco 'a n'atu ppoco...
Dopp' 'o tuocco, o p' 'o vino,
o, chi 'o ssa comme fuje,
ognuno arraccuntaje
'na fatticiello suje...
Ciccio 'o ngrese parlaje,
parlaje Pall' 'e cannone,
parlaje 'o Spilacita,
dopp' 'o Bellu guaglione.
Po' s'aiza, redenne,
'o Naso 'e cane e ddice.
(m'allicord' 'e pparole
file pe' file..) « Amice,
tiempe arreto appuraje,
c' 'a parte 'e Ffuntanelle,
nce steva 'na figliola
cu' ciert'uocchie...: ddoje stelle!
Vuje mo canuscite
Turillo 'o naso 'e cane,
già ve facite 'ncapo
si ll'avette 'int' 'e mmane!
'Nce faticaje 'nu poco;
ma, che vo di'? pe chella,
pure cient'anne 'e pene!
pecchè, ve dico, è bbella!
So ttre ghiuorne, 'a 'ncuntraje
'ncopp' 'e viche 'e Tuledo
sola sola, capite...
me nce mettette arreto;
pensaje: 'sta vota 'a coglio!
Me nce accustaje, lle dico.
« v'aggia fa 'na 'mmasciata »
e 'a porto 'int'a nu vico...
E... 'a facette capace;
ma... quanto 'nce vulette!
Embè, mo nun me scordo
'na cosa ca vedette...
'Sta figliola teneva.
nfra ll'ati rarità,
nu nievo accussì gruosso,
ncopp'a 'sta spalla ccà!...
Nun fernette 'e parlà . . . .
Vuje mme capite:
Rosa è d' 'e Ffuntanelle,
è 'na bella figliola
e tene ll'uocchie belle...
Rosa, tre ghiuorne arreto,
cu 'n'ommo fuje 'ncuntrata,
'ncopp' 'e viche 'e Tuleto!
Rosa tene 'stu nievo
'ncopp' 'a spalla reritta...
Era isso ch'i' vulevo!...
E... l'accedette!...
......
FINE