Divina Commedia (Napulitano)/1
A meza strata de la vita mia
Io mme trovai ntra na boscaglia scura,
Ch'avea sperduta la deritta via.
Ah! quanto a dì comm'era è cosa addura
Sta voscaglia sarvaggia, e aspra, e forte,
Che mme torna a la mente la paura!
È tanto amara che pò dirse morte;
Ma lo bene pe dì che nce trovaje,
Dirraggio cose che non songo storte.
Non saccio manco dì comme passaje,
Tanto comm'a stonato m'addormette,
Quanno la vera strata io llà lassaje.
Ma pò ch'io na collina llà vedette,
Addò chella campagna se feneva,
Che 'ncore la paura me mettette;
Guardaie pe l'aria, e arreto llà vedeva
Li ragge de lo luceto chianeta,
Che dritte fa sorcà li figlie d'Eva.
La paura no poco fuje coieta
Che dinto a chisto core era durata
La notte ch'io passaie tanto scoieta.
E comm'a chillo ch'a lengua affannata,
Arrivato a la riva de lo mare,
S'avota a l'acqua che se sbatte, e sciata:
Accussì st'arma mia stette a votare
Pe chillo luoco arreto da bardascio,
Che fice tanta gente annegrecare.
E arreposato io disse: ccà mo nascio,
Mme ncammenaie pe la riva deserta,
Sì, ca lo pede nnanze era cchiù bbascio.
E a lo principio teccote de ll'erta,
Na diavola veco de pantera,
Che de pilo ammacchiato era coperta.
E mme guardava co na brutta cera,
Anze li fatte mieje tanto guastava,
Ca voleva ì da dò venuto nn'era.
Tiempo era, e la matina se schiarava
E lo Sole saglieva co le stelle,
Ch'aveva co isso, quanno Dio criava
E'Ncielo e' Nterra tanta cosa belle;
Mme dette da sperare e co ragione
De chella fera la pittata pelle,
E l'ora de lo tiempo, e la stagione;
Non mperò che paura non me desse
La vista de gruossissemo lione.
Chisto pareva 'ncontro a mme venesse,
Co la capa auta, e co arraggiuse diente,
Che lo Cielo parea nne resentesse;
E pò na lupa, che de tanta gente
S'avea magnate gamme vraccie e ccore,
Attuorno mme venete into a no niente;
E sentennome mpietto n'antecore
La speranza perdette ch'avea vista,
De saglire a lo monte ncantatore;
E comme a chillo che trisore acquista,
E de morte arrivato ntra lle strette
Cchiù l'arma soja s'arraggia, e se fa trista;
Accussì chella bestia mme facette,
Che venennome attuorno chiano chiano
Fice sí che a lo scuro mme mettette.
E mentre stea pe scennere a lo cchiano,
Llà nnanze a ll'uocchie mieje se presentaje
Chi zitto e muto steva da lontano.
E quanno lo vedette accommenzaje:
Piatà de me, lo dico nfra de nuje,
O ommo, o ombra, o chello che sarraje.
E isso: Ommo non già, ommo già fuje,
E lli pariente mieje fujeno Lommarde,
A Mantova nascenno tutte e dduje.
Sotto a Giulio nascette, e fuje gia tarde,
E stette a Romma sotto a Ron Avusto
Ntiempo de chille Dieie fauze e busciarde.
Fuie Poeta, e cantaie chill'ommo justo,
Anea, che pò de Troja lassaje lle mura,
Quanno li Griece ficero l'arrusto!
Ma pecchè tuorne a tanta seccatura?
Pecchè non saglie ncopp'a chillo monte,
Prencipio e causa d'alleria sicura?
Sì tu chillo Vergileo e chella fonte,
Che chiacchiereja comm'a no Papasso?
Lle risponnette co scornosa fronte.
O de l'autre poete lummo a grasso,
Pe chell'opera toja, pe chill'ammore,
Pecchè letto l'aggio io passo pe passo.
Tu si lo masto mio, tu si l'aotore,
E da te schitto io lesto copiaje
Lo bello scritto che m'à fatto annore.
Guarda la bestia, pe essa io m'avotaje,
Saccente mio, mo damme ajuto, e ntutto:
Ch'essa mme fa tremmà, ma proprio assaje;
Cammino àje da cagnare pe lo ntutto
Dice, pocca ie chiagnette co sospire,
Si vuò sta pe sto luoco ascuro e brutto.
Ca chesta bestia che staje a sentire,
Non fa passà nisciuno pe la strata,
Primma lo sbramma e ppò lo fa morire.
E co natura accossì trista è nata,
Che magna primma, e doppo se nne lagna
E cchiù de primma sta peggio affamata!
A cciento e cciento bestie s'accompagna
Anfino che non esca no gran cane
Per farele fenì chesta cuccagna.
Nè chisto vo trisore sane sane,
Ma vò vertù e sapienzia non scompute,
Pe non restare co le mmosche mmane.
E sarrà de l'Italia la salute,
P'isso Cammilla vergene morette,
Aurialo, e Turno, e Niso de ferute;
Chisto la cacciarrà senza arriciette
Pe ttutte lle Cetà, nfì ch'a lo Nfierno
La portarrà, addò Mmidia la mettette.
Onne io pe tte, mo a mme penzo e discierno
Te dico: Viene ccà, damme sta sciorta,
Te voglio io mo portà a no luoco aterno!
Llà sentarraje li strille da la porta
Nzì addò stanno li spirete 'nfamate,
Che vonno n'autra vota fa la morta!
E l'autre vedarraje che so restate
Dinto a lo ffuoco, e sperano venire
Addò le ggente so tutte bìate;
E si addò lloro tu vuoje saglire,
Cchiù santa l'arma avraje de chesta mia:
Te lasso co essa quanno sto a partire.
Ca chillo che llà ncoppa fa la spia,
Pecchè a la leggia soia levaje li panne,
Non bò ch'accosto manco 'nchella via.
Tutto comanna e a tutte dà comanne,
Llà tene la Cetà, llà face tutto,
Fortunate le ggente che nce stanne!
E io Poeta mio, te cerco ntutto
Pe chillo Dio che tu non canosciste,
Azzò pozza fuì sto male bbrutto;
Portame llà, portame addò diciste,
Azzò veca lo Nfierno ntra li guaie,
E chille che tu meste mme faciste
Corrette allora, e io l’appeddecaje.