Divina Commedia (Napulitano)/11
CANTO UNNICESEMO
ARGOMIENTO
De na ripa sagliettemo a la cimma
Co prete rotte tonne, e llà cojeto
Jette ncopp'a no monte de taglimma.
Tanto era forte ccà no gruosso fieto
Ch'ascea da lo sprofunno cchiù vicino,
Che a no copierchio nce mettimmo arreto
De na fossa, addò steva scritto fino:
Papa Antastasio io ccà guardo e commoglio
Che da la ritta vija levaje Fotino.
Chiano da ccà io scennere mo voglio
Nfì che lo naso nce avrà fatto l'uso
A chesta puzza, e pò la vita te coglio.
E io le dicette: Masto si ccà nchiuso
Io sto co tte, lo tiempo non perdimmo,
Nce sto penzanno, disse curiuso.
Dinto a ste pprete che nuje ccà vedimmo
Dicette: ccà tre circole nce stanno
A grade a grade, comme da dò ascimmo.
De spirete mmarditte chine vanno:
Ma si t'avasta mo pure la vista,
Te dico pecchè se stanno abbraccianno.
D'ogne malizia, ch'odio 'ncielo acquista,
Ngiuria è lo fine e a ognuno sta a ffà male,
E o co forza o co arruobbo lo contrista.
De l'ommo male è arruobbo pure, e tale
Che spiace a Dio, e sotto fravoliente
Nce stanno e chiù dolore pò l'assale.
Lo primmo chirchio è tutto de violiente,
Ma pecchè se fà forza a tre perzone,
Attuorno tene tre scompartemiente.
A Dio, a sè, e a tanta perzone
Se pò fa forza, e nfra le lloro cose;
Lo ssentarraje co aperta ragione.
Morte pe forza, e ferute dogliose
A lo prossemo nuosto già se danno,
E 'ncendie, ed arroine assaje dannose.
E li mmecidiante ccà nce stanno,
Li guastature e autre appatentate,
Dinto a lo primmo giro jastemmanno.
A lo secunno giro trommentate
Nce stanno chille contro a lloro stesse,
Ca se songo li juorne già levate.
E nfra diebbete, guaje e cchiù cconesse
Pe lo juoco già ognuno nc'esce pazzo,
E ognuno chiagne si dolore avesse.
Ccà no Dio se tene qua pupazzo
Negannolo a lo ntutto pe dolore,
Facennole d'affese no scamazzo.
E fenesce a lo chirchio llà minore
Co sodomiste e co l'ausurare,
E co chi, a Dio non crede, e parlà 'ncore.
Lo latrocinio pò l'ommo ausare
Co chi se fida d'isso co la prova,
E co chi d'isso non se sta a fidare.
A chisto muodo ognuno scanna e nchiova,
Accedenno l'ammore de natura,
E a lo secunno chirchie ccà se trova.
'Nganno, fenzione e porzì chi affattura
Arruobbe, fanzetate e semonia,
Ruffiane, ausurare, autra lordura.
E se scorda l'ammore a sta pazzia,
E chello che natura lle sedogna,
Da do se crea la fede pe la via.
A lo chirchio minore llà se scogna
Addò stace Lucifero, la gente
Che aternamente scenne 'nzogna 'nzogna.
E io: sio Masto, assaje chiaramente
La capo toja ccà vede a rango a rrango
Sti guaje che durarranno aternamente.
Ma dimme: chille de sto brutto fango
Ch'acqua e viento già ll'àve annabbessate,
E che teneno lengue aspre de sango,
Pecchè non dinto de chesta cetate
So castigate si lo vole Dio?
E si non vole, a che stanno ammassate?
Disse: pecchè la capo pe golio
Te sfrenneseja mo chiù de non lo ssole?
O pure guarde addove non guardo io?
Non t'allicuorde de chelle pparole
Co le qquale non vuoje meglio 'mparare
Le ccose che lo cielo manco vole?
'Ncontinenzia e malizia ponno stare
Co ciucciaria, ma sulo ncontinenzia
Affenne meno a Dio, e pò passare.
Si tu mo pienze buono a sta sentenzia,
E t'allicuorde chi so sti sbafante
Che fanno da ccà ffora penitenzia,
Tu vedarraje pecchè da sti birbante
Stanno spartute, e a che meno ncasata
La Jostizia de Dio lle dà sti schiante.
Sole, che sane ogne vista turbata
Contentame no poco a chisto luoco
E levame da capo sta penzata
Votate da ccà arreto n'autro poco,
Dicette, addò l'ausura ccà s'assetta
Ch'affenne a Dio, e sta mmiezo a lo ffuoco.
Felosofia, mme disse, a chi l'aspetta
Nota, non pure pe na sola parte,
Comme natura a cammenà carfetta
Da ragione devìna e da chell'arte;
E si lo cuorpo tujo no poco nuote,
Tu trovarraje, non doppo d'assaje carte,
Che l'arte vosta chella, quanno pote
Face comm'a lo Masto e lo scolare,
Si ca chest'arte a Dio quase è nepote.
Da cheste ddoje, si staje mo allicordare
Da lo prencipio che tutto commene,
La vita stuta e gente fà avanzare.
E pecchè autra via l'avaro tene,
P'isso natura e la scolara soja
Disprezza, ca speranza autra lle vene.
Viene co mmico, a ghì tengo la foja;
Li pisce a mmare stanno sguizzejanno,
E lo Sole la rippa tocca e stoja,
La faccia de la terra allummenanno.