Divina Commedia (Napulitano)/14
Pò che la carità de do so nato
Me stregne, auno chelle fronne sparte
E lle ddò a chillo ch'era già abbrucato;
Pò venimmo a lo fine addò se parte
Da no girone a ll'autro justo, addove
Se vede la Jostizia la brutt'arte.
A mmeglio fa capì le ccose nove
Arrivammo a no vuosco a chella bbanna,
Che le ppiante da terra scippa e smove.
La serva addollorata ll'è ghirlanna
Attuorno, comme co essa fà lo fuosso,
E nce fermajemo ccà ma a rranna a rranna.
Nterra nce steva arena, aceno gruosso,
Ed era accossì tosta ed auta tanno,
Ch'a Catone avria rutto lo spercuosso.
O vennetta de Dio, e quanto e quanto
Tu àje a esse temuta da chi legge
Chello ch'a ll'uocchie mieje già dette vanto.
D'aneme annude io vedde tanta gregge
Che chiagnevano tutte amaramente
E pareva ch'aveano n'autra legge.
A la supina nterra stea sta ggente,
E stevano ciert'autre a penzare,
E l'autra jeva continovamente.
Era cchiù assaje chi stea a ccammenare
E chiù poco era l'autra a lo tormiento,
Ma a lo dolore steva cchiù a parlare.
Chiovea ncopp'a l'arena lento lento
Lo ffuoco a ppiezze senza maje riciette,
Comme cade la neve senza viento.
Quale Alisantro quanne a l'Innia jette
Fuoco ncuollo a li suoie isso vedeva
Cadere nfino a nterra e lo sentette;
Scarpesà lo tturreno isso faceva
Da li sordate suoie, ma lo vapore
De lo ffuoco stutà non ne poteva;
Scenneva tale e quale chill'ardore,
Comm'a ll'esca l'arena s'appicciava
Sotto a ffucile pe ffà cchiù dolore.
Chella folla de gente llà abballava
Senz'arrepuoso, da ccà e llà marciaie,
E la sciamma da tuorno se cacciava.
O tu che vince, Masto, accommenzaie
Le ccose, meno che la chiorma addura
Che ncontro a niue da ccà se presentaie,
Chi è chillo granne che non guarda e cura
Lo ncennio, e resta dispettuso e stuorto,
Nè de fuoco sta chiòppeta ammatura?
E chillo stisso che se fuje accuorto
Che d'isso avea a lo Duca addimmannato
Strellaje: Comme fuje vivo mo so muorto.
Si da lo cielo Giove nfuriato
Stette furmene acute assaje menanno,
Da li quale io pò fuje annabessato.
O s'isso stanca l'autre a quanno a quanno,
De Mongibello a la fucina negra
Buon Vesuvio, ajuta pò strellanno,
Comme isso fece a la guerra de Fregra,
Mme saittasse co tutta la forza
Non ne potria avè vennetta allegra.
Tanno lo Masto mio parlaje de forza
Tanno che io non l'avea manco sentuto:
O Capaneo, pe quanto non s'ammorza
Chesta superbia toja, cchiù si spremmuto;
Autro martirio, ca l'arraggia fora
Sarria pe tte dolore ben venuto.
Co meglio faccia a mme dicette allora:
Uno de chilli sette Rre ncapezza
Chillo fuje a Tebbe e avette e tene ancora
Dio pe no niente, e cchiù mo lo disprezza;
Ma comme io lle dicette, sti dispiette
So digne assaie de chesta bona pezza.
vieneme arreto, e abbada che non miette
Li piede nfra l'arena arza e già tenta
Ma aizale a lo vuosco niette niette.
Jettemo zitte addò sta comm'a penta
Fora la serva bello sciummetiello
Tanto russo ch'ancora me spaventa.
Comm'a Viterbo sta chillo rusciello
Ca le ffemmene prubbeche teneva,
Ccossì chillo scorreva a beveriello;
Lo funno co li scianche mpreta aveva
e sotto e ncoppa nchillo stesso lato,
M'addonaje che lo spasso lloco steva
Nfra tutto chello che t'aggio ammostato,
E trasenno da ccà pe chest'asciuta
Addò ognuno non è manco guardato.
Da ll'uocchie tuoie non fuie cosa veduta
Cchiù granne comm'a acqua che ccà scorre
Che le sciamme da ncopp'a essa stuta.
Dicette chesto ed autre ccose a mmorre,
E lo pregaie dicesse a mme cortese
Zzò ch'a farme sapè ncapo me corre.
A mmare sta guastato no paese
Chiammato Creta; me dicette tanno,
Fuie lo munno pe essa senz'affese;
Na montagna nce sta co no gran panno
D'acque e de frunne, Ida chiammata all'uso
E mo è deserta ncapo e 'mpede l'anno.
Rea la scigliette pe tenè annascuso
Lo figlio suio, contanno n'arrepiecchio,
Quanno facea chiagnenno lo picciuso.
A lo monte deritto sta no viecchio
Co le spalle votate Damiata,
E Romma guarda comme fosse specchio.
D'oro la capo soja tene formata
Vraccia e pietto d'argiento so e se crede
E la panza la tene isso arrammata.
E de fierro nfì abbascio pò se vede,
Ma lo pede deritto è terra cotta
E sta cchiù ncoppa de chill'autro pede.
Fora de ll'oro, ogn'autra parte è rrolta
Da na spaccata che llacreme goccia,
Le quale fanno chella brutta grotta.
Lo curzo lloro 'nchesta valle 'ncoccia,
Fanno Acaronte, Stige e Fregetonta,
Pò vanno abbascio pe sta stretta addoccia
Nfino addò non se scenne e nce se 'mponta
Fanno Cocito, e qua sia sto canale
Lo vedarraie; mperò ccà non se conta.
E io a isso: si sto ricco tale
Vene accossì mo ccà da o nuosto munno,
Pecchè ccà pure pare tale e quale?
E isso a mme: Saie che lo luoco è ttunno,
E si mbè ccà fusse spisso tu calato,
Pure a mmanca scennenno nfì a lo funno
Non si ancora pe lo chirchio avotato
Pecchè si cosa te compare nova,
Non te n'àie a restà maravigliato.
E io: Si Masto, dimme addò se trova
D'Acaronte e de Lete li duie sciumme,
E chi è che ffà fa sta brutta chiova?
Mme piace aca tu smuove sti fumme,
Dicette: ma chest'acqua tenta rossa
S'avria avuto da dì che so ste scumme.
Lete vedraie, ma fora de sta fossa,
Llà addò vanno chell'aneme a lavarse
Quanno la corpa lloro àve na scossa.
Ma mo vide ch'è tiempo de scostarse
Fa lo vuosco che vide a chest'asciuta
Ca li scianche non so state a brusciarse
E 'ncopp'a lloro ogne vampore stuta.