Divina Commedia (Napulitano)/2
E io Poeta mio, te cerco ntutto
Pe chillo Dio che tu non canosciste,
Azzò pozza fuì sto male bbrutto;
Portame llà, portame addò diciste,
Azzò veca lo Nfierno ntra li guaie,
E chille che tu meste mme faciste
Corrette allora, e io l’appeddecaje.
Lo juorno se ne ieva e ascea la notte,
Che metteva le bbestie co la paglia,
E poveriello io mmiezo a tanta bbotte
M’apparecchiava pe la gran battaglia,
De lo cammino e de la gran piatate,
Che cantarrà la mente che non sbaglia.
O muse, o gran talento m’aiutate,
O mente, che nzò chello ch’io vedette
Screviste, mo me scanza da mazzate.
Poeta che mme puorte, io pò dicette,
La vertù mia mo guarda si è potente:
Non mporta ca pe ghì no poco aspiette.
Tu dice che de Sirvio lo parente
Che pe cient’anne e cchiù se mmortalaie,
Sensibbele pareva a li portiente.
Si lo diavolo pò tutto apuraje,
Curtese fuje, penzanno a lo momento
Ch’aveva ascì da isso, o ogge o craje;
Non pare ndegno a n'ommo de talento,
Che fuie de Romma, e ancora de lo Mpero
Chammato pe papà a lo Firmamiento.
Lo quale co la quale a dì lo vero,
Fuieno scigliute nchillo luoco santo,
Addò lo successore sta de Piero.
Pe sta iuta, de che te daie tu vanto,
Ntise cose che fuieno lo portiento,
De la vettoria, e lo papale ammanto.
Nce jette poje San Paolo assaje cuntento
A nuje cunfuorto nchella Fede a dare,
Ch'è prencipio a la vita de sarvamiento.
Io che nce vengo a ffà? ch'aggio da fare?
San Paolo non songo io, non songo Anea,
Nè io degno de zzò me sto a vantare ;
Io de venì scordato mme credea,
Ma mo pazza sarrà chesta venuta,
La lengua mia capisce che pazzea,
E comme uno, na cosa che à voluta
Cchiù non la vole, e cagna de proposta,
E accommenza a piccià nzì che l'à avuta.
Tale fuje io nchella ascura costa,
Pecchè, penzanno, conzumaje la mpresa,
Che quanno accommenzaje fuje tanto tosta.
Si la parola toja bona aggio ntesa:
De chillo guappo risponnette l'ombra,
E' l'arma toja da la paura affesa,
Che spisso spisso l'ommo te nzolombra
Lo stà a votà nchella mpresa d'annore,
Comme vede la bestia che s'adombra.
E azzò tu lasse mo chisto tremmore,
Te dico a che venette e che sentette,
Quanno avette de te pena e dolore.
Nfra li spirete appise io mme mettette
Femmena mme chiammaje viata e bella,
Sì che de commannare io le dicette.
Lucevano chill'uocchie chiù de stella,
E accommenzaje po a dì chella Mbriana
Co bona cèra, e voce azzeccosella:
O anema cortesa Mantovana,
La grolia toja ccà ancora nterra dura,
E sarrà, quanto a lo munno lontana.
L'amico mio e nò de la ventura,
Pe la deserta spiaggia è mo mpeduto
Pe cammenà, che torna pe paura:
E credo che non sia già già sperduto,
Che tarde a lo soccurzo io sia levata,
Ca d'isso ncielo aggio io tutto sentuto.
Te muove, e co la toja parola amata,
Vergilio mio, non lo fa sbermenire,
Ajuto dàlle, e io resto conzolata.
Io so Biatrice che te faccio jire;
E vengo da dò voglio tornà priesto
C'ammore mo m'à fatta ccà venire.
A lo Signore mio si nnanze io resto,
De te m'avantarraggio nfaccia a isso.
Fenette, e io accommenzaje lo riesto:
O vertolosa femmena che spisso
La razza umana tu faie sta ncontiento
Da chillo Cielo che sta 'mperebisso.
Me piace lo tujo mannamiento,
Ca te vorria servire a barda e a sella,
Te capesco pe ll'aria comm'a biento.
Ma pecchè non te guarde mo la pella
De lo venì ccà abbascio nchesta parte
Da dove, pe tornà, faje sputazzella?
Si vuò sapè lo tutto a parte a parte,
Te dico accurto accurto, me respose,
Che paura da ccà, no, non me sparte,
Paura s'à da avè de chelle ccose
Ch'ànno forza de fare de lo mmale,
De ll'autre no, che non so paurose,
Io so fatta da Dio, e songo tale,
Che la miseria vosta non me smove,
Nè sciamma de no' ncennio a me m'assale.
Na femmena sta nCielo e se commove
De chisto mpedemiento addò te manno,
N'avraje da la Justizia llà le prove.
E ghienno essa Lucia poje cercanno
Dicette: Nce àje da essere fedele
E sulamente a tte ll'arraccomanno.
Lucia nemmica d'ogne ommo crurele
Venette nchillo pizzo addò steva io
Quanno me nce assettava co Rachele.
Dicette: Biatrì laude de Dio,
Soccurre chi te vole bene tanto,
Che d'ascì da la ciurma ebbe golìo.
D'isso non siente tu rèpeto e chianto?
Non vì, la morte che lo sta a sbranare
Pe ncopp'a la sciumara, e ne fa vanto?
E gente mai nce fuje che stette a fare
Lo bene lloro, ed a fuì lo danno,
Comm'io doppo che stette a chiacchiariare:
Venette ccà lo pizzo mio lassanno
Fidannome a lo ttujo parlare aonesto
Ch'annora te, chille che ntise l'ànno
E doppo che m'avette ditto chesto,
Chiagnenno votaje l'uocchie co sospire,
Ca venenno facette priesto priesto.
Essa votaje, e io ccà stette a venire,
Da nanze a chella fera te levaje
Ch'a lo monte non te fice saglire.
Donca ched'è? pecchè mo te ne staje,
Pecchè tanta paura tu te miette?
Pecchè ardire e franchezza non àje?
Doppo che ste Fegliole benedette
Se curano de te nfra li biate,
E tanto lo parlà mio t'apprommette?
Comm’a sciure, che nchiuse so ghielate
E lo Sole le fa la faccia janca,
Apierte tu li vide e adderezzate;
Accossì mme fice io de vertù stanca,
E tanto ardire me corrette ncore,
Ch’accommenzaje, comm’a perzona franca:
Chella che me soccorre è de buon core,
E tu cortese, ch’àje già dato puosto
A le pparole soje vere d’ammore.
Tu m’àje lo core tanto assaje dispuosto
A lo venì, co le pparole toje,
Ch’io so tornato a lo primmo propuosto.
Mo va, ch’io voglio chello che tu vuoie
Duca, Signore, Masto e acqua de maggio,
Dicette, e doppo fatte sti catuoie
Trasette pe lo luoco auto e sarvaggio!