Divina Commedia (Napulitano)/21
Ccossì de ponte 'mponte, autro parlanno
Che la commeddia mia cantà non cura,
Venettemo a la cimma usto quanno
Restajemo pe vedè de ll'autre mmura
De Malaborge, e l'autri lamiente,
E la vedette tutta quanta scura,
Quale pe l'arzenale mmiezo a bbiente
Volle la pece a lo vierno jelato
P'arrepezzà li rutte bastemiente
Che cammenà non ponno, e a sto ccontato
Chi fa nova la varca, e chi co stoppa
Acconcia chella che àve cchiù viaggiato;
E chi vatte da prora e chi da poppa,
E chi fa rimme, e chi te fa le ssarte,
Chi terzaruole acconcia e sotto e ncoppa;
Tale, pe ffuoco no, ma sulo pe arte
Volleva abbascoi llà na gran pignata,
Che 'nquacchiava la riva p'ogne parte.
Io vedeva lo fummo a la spartata,
E le 'mbolle che sempe essa aizava,
E la pece cadea tuttas squagliata.
Mmentre io llà abbascio fitto nce guardava
Lo Masto mio dicenno, guarda, guarda,
Da chillo luoco mio llà me scostava.
Tanno mme voto comm'a chi ritarda
De vedè chello ch'àve da fuire,
Pe lo quale à paura assaje gagliarda,
Che pe vedè non cura de partire;
No diavolo niro aveva arreto,
Che da lo scuoglio steva a nuje a venire.
Comm'era brutto mmiezo a tanto fieto!
Parea volesse justo a nuje magnare,
Avea le scelle aperte, e stea cojeto!
Le spalle soje stevano a aizare,
E sotto a isso avea no peccatore,
Che co li piede steva a carfettare.
De chisto ponte, o Malebranche, annore
Chist'è chill'Anziano a Santa Zita;
Tienelo sotto ch'io torno de core
A chella terra che ne sta sciorita:
Ogn'ommo è assaje busciardo e vota fuoglio,
Meno Bonturo, e pe denare à vita,
Llà abbascio lo menaje da chillo scuoglio,
Se votaje, e maje no cane se menaje
Co tanta pressa a scommiglià no mbruoglio.
Chillo cadette, e a galla pò tornaje;
Ma li Diavole avenno lo copierchio
Strellajeno: dinto ccà sempe starraje;
Ccà non se nata comme nfra lo Sierchio:
E si calate non buò avè sicure,
Non stare a galla ccà co lo soperchio.
Pò co forcine a cciento li ppunture
Lle devano, dicenno: abballa, abballa,
Vide si può arrobbà ccà ddinto pure.
Li cuoche tale e quale comm'a ppalla
Fanno acalà la carne a le ccaudare,
Co forchettune, azzò non saglie a ggalla.
Disse lo Masto: Azzocchè non 'nce pare
Che tu ccà staje, va abbascio e va t'agguatta,
Primma che ccà s'avessero a sdignare.
E già che n'ammenaccia a mme n'è fatta,
N'avè appaura, aggio le ccose pronte,
Ca n'autra vota me trovaje 'ntrasatta.
Pò passaje pe ncopp'a chillo ponte,
E arrivato che fuje a la ripa sesta,
Avette da tenè sicura fronte.
Co chella furia e co chella tempesta
Che lo cane secuta a poveriello,
Che addimmanna addò va e addò s'arresta;
Chill'ascettero da lo ponticiello,
Votanno contra d'isso le fforcine,
Ma dicette isso: ognuno sia chiachiello.
Primma de mme pigliare a vuje vicine
Ste fforcine, uno ascesse da ste mmorre,
Pe sentirme e ppò vàtterme a li rine.
Malacoda voleva ognuno, e corre
Uno subbeto e ll'autre erano ferme,
E chisto addimmannaje: Neh, che t'accorre?
Cride tu, Malacoda, ccà vederme
Esse venuto, lo Masto dicette,
Sicuro già de vuje pure saperme,
Senza la volontà de chi volette?
Lassamme ì ch'a lo Cielo à già voluto
Ch'io nzignasse sti luoche, e ste scogliette.
Allora io lo vedette nzallanuto,
Ca se lassaje cadere la forcina,
Dicenno a l'autre: Che non sia feruto.
Lo Masto a mme: lo ponte t'avvicina
A mme, pecchè te veco guatto guatto,
Perzò a mme tuorne mo pe stammatina.
E io nce sto vicino nnitto 'nfatto;
Li diavole se ficero nnante,
Credette io non avessero cchiù patto.
Credette avè paura de li fante,
Ch'ascevano co patte da Crassona
Vedennose llà nfra nemmice tante.
Mm'accostaje io co tutta la perzona
A lo Sio Masto, e non torceva ll'uocchie
Da la faccia d'ognuno, e nn'era bona.
Vuò che toccammo ccà cheste ppannocchie
Risponnevano: Si, fa che l'accuocchie.
Ma lo diavolo che avea sermone
Co lo sio Masto, s'avotaie llà priesto,
Dicenno: posa, posa, Scarmiglione.
Pe ccà non se pò ghire, a nuje pe riesto
Nce stette a dire, che a sto scuoglio stace
Tutto spezzato nfunno l'arco sesto.
E si a ghì nnante ccà pure ve piace,
Jatevenne pe ncoppa a chesta grotta;
Ca n'autro scuoglio llà strata ve face.
Ajere ccà a cinco ore, a una botta,
Mille e dujeciento co sissantaseje
Scompettero, e sta via restaje ccà rotta
Io manno mmiezo llà de chisti mieje
A vedè si quarcuno s'avvicina;
Co lloro jate, e non sarranno peje.
Jate nnante Aricchino e Carcabrina,
Accommenciaje llà a dire, e tu Cagnazzo,
E Varvariccia porta la decina.
E venga Ribbecocco e Drachignazzo,
Ceriatto zannuto e Scippacane,
E Farfariello, e Rubecante pazzo.
Mettite attuorno a lloro mo le mmane,
Sarvate tutte quante pe sto scuoglio
Che tutto quanto va ncopp'a le ttane.
Oh! Masto mio!, che veco! ajemmè che mbruoglio!
Sule sule, nce jammo, io le dicette,
Si nce saje ire, mmiezo a st'arravuoglio.
Si tu si fino, e sempe io lo credette,
Vide ch'ognuno stregne mo li diente,
E co lle ciglia a mmenaccià se mette?
E isso a mme: N'avè appaura a niente,
Lassale tutte quante ammenacciare,
Ca chesto face chi dolore sente.
Lloro a mmancina jettero a mmarciare,
E ognuno avea la lengua primma stretta,
Stanno a la capo li diente a mmostare,
La capo, che lo culo avea a trommetta!