Divina Commedia (Napulitano)/22
Io vedette sordate ire a lo campo,
E nfaccia a lo nemmico fare mmosta,
E partì cierte bbote a piglià scampo:
E ssacco e ffuoco pe la terra vosta
Vedette, o Aretine, e le gguardane
Ferute a li tornieje correnno 'ngiosta,
quanno co ttromme e quanno co ccampane
Co ttammurre e co spare de castella,
Co ccose forastere e ppaisane;
Nè già co na deverza ciaramella
Io vedette scordate tante e tante,
Nè barca a segno de terra o de stella.
Ievamo llà co diavole nnante,
Ca se sape a li Sante co la Cchiesa,
E a la taverna vaje co li birbante.
Pure la mente mia llà steva ntesa
Pe vedè de la borgia lo ppenare,
E de la gente che nce steva appesa.
Comm'a li pisce-cane mmiezo mare
Zompano arreto de li bastemiente
Pe ffarele scampà a li marenare;
Tanno, p'alleggerì chilli tormiente,
Mmostava ogne dannato lo spercuosso,
E ppò l'annasconneva into a no niente.
E comme dinto a ll'acqua de no fuosso
Le rranocchie nce stanno appantanate,
Nasconnenno lo cuorpo nfino a l'uosso,
Llà stevano accossì chilli dannate,
Ma comme compareva Varvariccia,
Dèvano pe cchiù 'nzotta sommozzate.
Vedette, e mme se fa la faccia piccia,
Uno aspettà accossì, comme isso 'ncontra,
Che na ranocchia resta, e l'autra spiccia.
E Scippacane che lle steva contra
Te l'acchiappaje llà llà pe li capille,
E ncoppa lo sagliette comm'a lontra.
Io già lo nomme ne sapea de chille,
Quanno lo Malacoda li chiammaje,
E n'aspettaje sentì lo nomme a strille.
O Rubicante, falle sentì guaje
E scòrteca co ll'ogne addò cchiù bbuoje,
De li mmarditte ognuno llà strellaje,
E io: Sio Masto mio, fallo, si puoje
Che tu sacce chi è lo sciaurato
Che s'è azzuffato co nnemmice suoje.
Lo Masto mio nce s'accostaje de lato
Dicenno: De dò si? chillo dicette:
Io da Navarra songo proprio nato:
E Màmmema a servire mme mettette
Co uno che m'aveva gennerato,
Che arroinare a isso stesso stette.
E da Tebardo Rre fuje pò 'mpiecato
Barattaria facenno, e mo me nzocca,
E pecchesto mme trovo ccà nfeccato.
E Cerrato cco dduje diente mmocca
Comm'a lo puorco, lle dà morza e bbatte,
Stracciannole ferute addò lo tocca.
Lo sòrece già stea nfra male gatte,
Ma Varvariccia l'acchiappaje pò 'mbraccia,
E stateve, dicette, ca mo sbatte.
E a lo Masto mio votaje la faccia,
Dicenno: Spìa mo che buò sapere,
Primma che quarcheduno mo lo caccia.
Lo Masto: Parla ccà, ma co dovere,
Quarcuno tu canusce ch'è Latrino
Sotto a la pece? E chillo: Io jette aiere
Da uno che restaje pe llà vicino:
Co isso accossì fosse io ccà copierto,
Ca nn'avarria paura d'ognia e angino!
E Libicocco: troppo s'è sofferto,
Dicette, e llà no vraccio l'acchiappaje,
E lle sceppaje, straccianno, no lacierto.
Drachignazzo a le ggamme lo porpaccio
Acchiappaje pure, e co la capo arreto
Attuorno s'avotaje pe tanto 'mpaccio,
Quanno no pocò ognuno stea cojeto,
A isso che guardava la ferita,
Addimmannaje lo Masto 'mbuono fieto:
Chi fuje chillo che pe mala partita
Ccà faciste a lo mmeglio tu venire?
Risponnette isso: Fuje lo Fra Gomita,
De Gallura, e co vizie senza dire,
E che Nino tradette lo sovrano,
E ognuno bene non ne pò sentire.
E pe denare lo 'ngannaje lo strano,
Comm'isso dice, e fuje gran barattiere,
Non piccerillo, no, ma gran ruffiano.
Michele Zanche ccà stace a ddovere
De Logodoro gran Signore, e arrogna,
E ogge parla co isso comme ajiere.
La faccia de chill'autro non se scogna,
E parlarria, ma aggio paura che isso
Non s'apparecchia a grattarme la rogna,
E Varvariccia a Farfariello spisso
Che strallunava ll'uocchie pe fferire,
Dicette: Fatte ccà brutto spamisso.
Si vuje volite vedere o sentire,
Accommenzaje lo spaurato appriesso
Trosche o Lommarde, io li ffarraggio ascire,
Ogne diavolo ccà se stesse ciesso,
Pe non avè paura de vennete,
E io, assettato a chisto luoco stesso,
P'uno sulo farraggio ascirne sette
Quanno lo sisco faccia, è d'uso farse,
Azzò che ffora ognuno ccà se mette.
Cagnazzo a chesto se sta a disperarse,
Capozzianno dice: Che malizia
Chisto à penzato, abbascio pe menarse,
E isso che tenea fune a ddevizia,
Dicette: Maliziuso songo troppo,
Quanno procuro ccà chesta trestizia.
Alechino sbottaje comm'a no cupoppo,
E a l'autro dicette isso: Si t'acale,
Io non te vengo arreto de galoppo.
Ma starraggio a la pece tale e quale,
Lassanno de sta ccà a la ripa jenno,
Pe vedè chi de nuje ccà cchiù mo vale.
Mo nove cose venarraje sentenno,
Ca ll'uocchie suoje da llà lesto avotaje,
Chi primma chello llà steva facenno.
Lo Navarrese tutto ammesuraje,
Dinto a no punto llà nterra scennette,
Zompanno da chill'autre se scostaje:
De che ogneduno assaje se resentette,
Ma chillo che lo mbruoglio stea a'nrgiarmare,
Tu si arrivato? lesto lle dicette.
Ma non potenno cchù manco volare,
Chillo, jette qua fùrmene da sotta,
E lo pietto da ncoppa stette a ddare.
Accossì fa la papera de bbotta,
Vedenno lo farcone essa sparesce
E chillo torna ncoppa e 'ntofa e 'ngotta,
Carcabrina se nfuria e nzallanesce,
Volanno lle va arreto, nnammorato,
Azzò p'isso la pece nce fenesce.
Comme lo barattiere fuje scostato,
Ll'ognie avotaje a chillo sujo compagno,
E co isso nfra lo fuosso fuje acchiappato.
Ma l'autro dà mazzate senza lagno,
E tutte duje se fanno anze sceppate,
Cadenno mmiezo a lo vollente stagno.
Lo fummo avea li duje già già cecate
E nisciunopoteva cchiù aizarse,
Ca le scelle fatte erano azzeccate.
Varvariccia co ll'autre sta a'nfumarse
Quatto ne fà volà da l'autra costa,
E porzì le fforcine sta a menarse.
Da ccà da llà scennettero a la costa,
Posanno tutto a ll'aneme dannate,
Che stevano già cotte nfra la crosta,
E li llassajemo llà tutte 'nquacchiate!