Divina Commedia (Napulitano)/23
Zitte, sulille, e senza compagnia
Jevemo nnanze l'uno, e l'autro appriesso,
Comme fanno li muonace pe bìa.
E penzava a la favola pecchesso
De la ranogna, pe lo fatto d'oje,
E de lo soricillo muorto ciesso:
Ca mo nce aggio a penzà, vuoje e non vuoje,
Vedenno chist'appicceco de faccia,
Sentenno primma e doppe sti catuoje.
E comme no penziero l'autro caccia,
Accossì doppo io llà n'avette duje,
Ca la primma paura m'ammenaccia.
Io penzava accossì: Chiste pe nuje
So ccarfettate tutte tale e quale,
Tanto ch'ognuno già scocciato fuje.
E si mo ll'ira vò punì a lo mmale,
Appriesso cchiù sceppate ccà sarranno
Chille che venarranno a scale a scale.
Mme senteva arriccià li pile tanno
Pe la paura, e steva arreto attiento,
Quanno dicette: Masto, a tanto danno
mettimmoce annascuse a sto spavento
De Malebranche, e stanno già venenno,
Tanto che pare che già già li ssento,
E chillo: si foss'io specchio, e te ntenno,
Non potarria piglià la faccia toja,
Comme capesco quanto vaje dicenno.
Lo ppenzà tujo a lo mio già dà na foja
Co sto stesso atto e co sta faccia stessa,
Tanto ch'a tte lo penzà mio s'appoja.
Si a deritta a la costa jammo 'mpressa
E pe llà abbascio jire nuje potimmo,
A chille arreto fà potraje la sguessa.
Mentre penzammo a cchello che facimmo,
Co scelle aperte veneno a sti guaje
Chilli tale a pigliarce, e nuje fuimmo.
Lo Masto lesto lesto mm'acchiappaje,
Comm'a la mamma che pe lo rummore
Mmiezo a le sciamme lesto se scetaje,
Piglia lo figlio e scappa co tremmore
Avenno cchiù pe chillo sulo cura,
Co sola na cammisa, e tremma 'ncore:
Abbascio de la ripa accossì addura
Corcato da llà subbeto se mena
E nce passa accossì chella paura.
Maje d'acqua non corrette la gran chiena
A bbotare na rota de mulino,
Quanno cchù corre, comme sango 'mbena,
Comme lo Masto mio pe llà bbicino
Llà me portava pe ncopp'a lo pietto
Comm'a no figlio, e no comm'a vicino.
Appena piede nterra a chillo lietto,
Chill'arrivajeno llà fatte a scogliette,
Da ncopp'a nuje, ma senza avè sospetto:
Che lo Cielo lo quale pò volette
Farle Menistre de la quinta fossa
Partì a nisciuno cchiù da llà facette.
Gente trovajemo llà tutta pittata,
Che attuorno gira e già la pelle arrogna,
Chiagnenno, co la faccia già stancata.
Cappuccio ognuno tene qua zampogna,
Pe nnanze a ll'uocchie, fatte de la taglia
Che se fà pe li Muonece a Cologna.
So 'ndorate da fora, e tutto abbaglia,
Ma dinto tutto chiummo, e piso tanto,
Ca Feterico li mettea de paglia.
O pe l'aterno faticuso manto!
Nuje nce avotajemo pure a mmano manaca
Nzieme co lloro pe ssentì lo chianto.
Ma, pe lo piso, chella ggente stanca
Ieva chiano accossì, ch'eramo nuove
A ogne passo che ffaceva l'anca.
Pecchè io a lo Masto mio: Fa che tu truove
Chi a lo nomme o a lo fatto se canosca,
E ll'uocchie, accossì ghienno, attuorno muove.
Uno, sentenno la parola trosca
Arreto nce strellaje: N'avite affanne,
Vuje che corrite pe chest'aria fosca;
Fuorze avarraje da me zzò ch'addimmanne,
Lo piso li 'mpedeva e la via stretta.
Arrivate ogneduno mme vedeva
Senza fa mutto e senza dì parola,
Pò ognuno a isso stesso se diceva:
Chisti ccà songo vive 'ncannavola,
E si so muorte pe qua privileggio
A portare non stanno la gran stola?
E dicettero a mme: Si a lo colleggio
De li fauze triste sì bbenuto,
Dince chi si, non fa credere peggio.
E io a lloro: Io fuje nato e crisciuto
Ncoppa de lo sciummo Arno, llà, a Sciorenza
Sto co lo cuorpo ch'aggio sempe avuto.
Ma vuje chi site che nfra sta scajenza
Tanto dolore avite co le cciappe?
Che ppena avite? aggiate confidenza.
Uno dicette a mme: So ccheste ccappe
De chiummo accossì grosse, ca li pise
Le bbalanze cadè fanno, e l'acchiappe.
Frate Gaudiente fujemo, Bolognise,
E chisto è Loteringo, io Catalano,
E da la terra toja ccà fujemo mise,
Comme s'acchiappa a n'ommo de pantano
Pe starese cojeto, e fujemo tale,
Ca vedimmo case arze da lontano.
Io lle dicette: O vuje, li vuoste male...
Cchiù non parlaje, ca lesto io llà smicciaje
Uno nchiovato nterra co tre ppale.
Vedennome isso lesto se stezzaje,
Scioscianno into a la varva co sospire,
E Catalano appena s'addonaje,
Dicette: Tutto chesto che tu ammire
Lo Fariseje sagliette mperebisso,
Martirie a n'ommo fice assaje sentire.
Annudo pe la vìa mo stace chisso,
Comme tu vide, e primma s'à da sente
Chi passa quanto pesa ncuollo a isso.
Accossì pò lo suocro nfra li stiente
A sta fossa, e pò ll'autre de concilio
Che a li giudieje già dettero patente.
Se maraveglia allora Sio Vergilio
Ncoppa de chillo ch'era stiso 'ncroce
Dinto de chillo brutto e aterno asilio:
A lo Monaco pò votaje la voce:
Non ve sia pe comanno de nce dire
Si a la deritta jammo addò nce coce,
Azzò che tutte duje potimmo ascìre
Senza che stò diavole a cchiammare,
Nncopp'a la vìa pe ffarece mettìre.
Respose: Cchiù che ttu non staje a sperare
Na preta che se move nc'è cca nnanze,
E sta ncopp'a li fuosse a ccammenare.
Ma si essa è rrotta attiente, e tu te scanze;
Saglì potite ncopp'a cchelle mmure
De chella costa ch'àve brutte ausanze.
Lo Masto dà a la capo acalature
Dicenno: Non contaje bone le mprese
Chillo che sfrocoleja li peccature.
Lo Monaco: A Bologna io dire 'ntese
Li vizie do Diavolo, e sentette
Chi è bosciardo, e lo patre è de l'affese.
Lo Masto tanno lesto se nne jette
E nfuriato s'ammostaje llà chiaro,
E io da llà porzì pò mme partette
Jenno appriesso a lo Masto accossì ccaro.