Divina Commedia (Napulitano)/3
Pe mme se va nfra la cetà cocente,
Pe mme se va nfra l’aterno dolore,
Pe mme se va nfra la dannata gente.
Jostizia smoppe l’Aterno Fattore,
Me fice la Devina Potestate,
La Sapienzia, e lo devino ammore.
Primma de me non fuieno criate
Che cose aterne, e nzempeterno io duro,
Si ccà trasite niente ne sperate.
Cheste pparole de colore ascuro
Vedette scritte ncoppa de na porta,
E io: Lo senzo, Masto mio, m'è adduro.
E isso a mme, comm'a perzona accorta,
Lassa ccà de sospetto ogne golìo,
Commene che paura ccà sia morta.
Simmo venute addò t'aggio ditto io,
Ccà vedarraje li ggente che mmardette
Ntennere cchiù non potarranno Dio.
E doppo che la mano mme projette
Co bona faccia che me conzolaje,
Nfa le ccose secrete me mettette.
Llà de chiante, suspire, allucche e guaje
Rembommava chell'aria senza stelle,
Tanto ch'appaurato io me fermaje,
Tanta lengue co brutte parlatelle
Parole de dolore a cciento a cciento,
E no suono de mane nfra de chelle
Faceano no fracasso che a momento
Jeva pe ll'aria scura ntutte ll'ore
Comme l'arena, quanno scioscia viento.
lo dicette, sentenno n'antecore,
Chesto che sento, Masto, a ffà che vale?
Che gente è chesta mmiezo a sto dolore?
Isso me responnette tale e quale:
Accossì tristo d'anema è arreddutto
Chi bene non facette, e manco male,
Mmiscate songo a chillo coro brutto
D'Angiole, che non fujeno rebbellate,
Nè a Dio fedele, ma pe lloro ntutto.
Che da lo Cielo fujeno cacciate,
Nè lo Nfierno li bbò, non li riceve,
Chè n'avarriano grolia li dannate.
E io: Sio Masto, dì? qua so li peve
Che fanno fà ste bbuce cupe e fforte?
Me risponnette: te lo dico 'mbreve.
Chiste non ànno speranza de morte,
La vita lloro tanto se sconquassa,
Che mmediuse so d'ogne autra sciorte.
Nisciuno nterra nomme nò nce lassa.
Misericordia e Ghiostizia li sdegna,
Non ne parlammo cchiù, ma guarda e passa!
E io guardanno llà veco na nzegna,
Che giranno assaje priesto essa correva,
Che d'ogne posa me pareva 'ndegna.
E tanta gente arreto lle veneva
Ch'io non me sarria pò maje creduto
Che tanta e tanta morte accise aveva?
Quanno cchiù d'uno avette canosciuto,
Vedde l'ombra de chillo sciaurato,
Che schitto pe paura fuje perduto.
Ntennette tutto allora, e fuie accertato
Ca chiste erano tutte spolletrune
Ch'aveano a Dio dispiacere dato.
Chisti muorte pe sempe, sciauratune,
Senza cammisa, erano pezzecate
Da vespere, tavane e moschigliune!
Le ffacce le faceano nzanguinate,
E lo sango e lo chianto nterra sciso
Da li vierme venevano zucate.
E quanno pò cchiù llà fuje a guardà miso
Vedette gente addò sbocca no sciummo
Pecchè dicette: Masto, che m'àje ntiso,
Famme sapè chi so ste ggente nfummo
E che li ffà parere a morì pronte,
Comme lo beco co sto miccio lummo.
E isso a mme: le ccose senza jonte
Da me te venarranno allora ditte
Quanno jammo a lo sciummo d'Acaronte.
Tanno co ll'uocchie 'nterra fitte fitte
Pe paura de fà na frittatella
Arrivajemo a lo sciumo proprio affritte.
Teccote co na negra castaudella
Venì no viecchio a pile janchìate
Strellanno: Guaje a vuje co st'arma fella!
De vedere lo cielo non sperate,
Io vengo pe portarve a ll'autra riva,
Addove è scuro a lo vierno e a la state.
E tu che mo staje ccà, anema viva,
Spàrtete mo da chiste che so mmuorte,
Ma pò vedenno che non me partiva,
Dicette: Pe autre vie e autri puorte,
Ma non pe ccà, tu potarraje passare,
E co varca cchiù leggia tu te puorte.
Lo Duca a isso: Non te ncojetare
Che tanto llà se vole, addove tutto
Se pote, onne tu cchiù nn'addimmannare.
Tanno la faccia fuje cojeta ntutto
De chillo marenaro a la palude
Ch'attuorno a ll'uocchie avea no fuoco strutto.
Ma chelle annegrecate aneme annude
Cagnajeno faccia strignenno li diente,
Sentenno priesto le pparole crude.
Jastemmavano Dio e li pariente,
La razza umana e spisso la natura,
La causa de li loro nascemiente.
Partettero co ffaccia affritta e scura,
Chiagnenno nchella riva desperata,
Ch'aspetta chi de Dio non à paura.
Caronte co la vista assaje nfocata
Le fface signe, e già te l'arravoglia,
Co no rimmo le fà na mazziata.
E comme d'Avutunno a foglia a foglia
Se spoglia, nfì che mosta, l'arbosciello
Li ramme lisce lisce, comm'a nnoglia;
Justo comme pe nganno de ciammiello
Cadeno da la sponna a una a una
Comm'a lo bisco fa lo passariello.
Accossì vanno ncopp'a l'onna bruna,
E primma che dà llà fossero scese,
Da ccà na frotta nova già s'aduna.
Figlio, dicette lo Masto cortese,
Tutte li muorte co l'ira de Dio,
Tutte veneno ccà d'ogne paese.
E pronte songo a trapassà lo rio,
Jostizia li ffà lesto cammenare,
Ca la paura pare no golìo.
Anema bona nò nce sta a ppassare,
E si Caronte mo de te se lagna,
Ntennere puoje pecchè stace a strellare.
Fenuto chesto, la scura campagna
Tremmaje, la fronte mia pe lo spavento
Ancora de sudore me s'abbagna;
E la terra menaje no brutto viento,
E rrossa llà na luce che n'ascette
M'abbarbagliaje la vista a lo momento,
E muorto de lo suonno io llà cadette!