Divina Commedia (Napulitano)/33
Aizaje la vocca da le mmorza amare
Lo peccatore, e s'annettaje lo musso
A li capille, a mmeglio sta a parlare,
E accommenciaje Tu mo me faje fa russo
Penzanno a lo dolore che mme ngotta,
Che senza che te dico, io mo te busso.
Si le pparole meje, sango de potta!
A chi mo voglio male nfamarranno,
A chiagnere e a pparlà faccio una botta.
Io non saccio chi si, nè vao penzanno
Pecchè si sciso ccà, ma Sciorentino
Mperò mme pare quanno staje parlanno.
Sacce che io fuje lo Conte Ucolino,
E chisto è l'Arciviscovo Ruggiere,
Mo te dico pecchè nce sto vicino.
Pe causa de li suoje male penziere
A fidareme d'isso mme so mmiso,
Anfì che songo muorto, e pare ajiere.
Mperò si tu non àje mo ccà già ntiso
Che morte fice ccà, si tiempo scorre,
Mo sentarraje si m'à affeso, o mpiso.
Da na fenesta dinto de la torre,
Ca pe me mo se chiamma de la famma,
E addò gente starranno qua savorre,
Lo tiempo me mmostaje che scorze a rramma,
Quann'io comm'a stonato mme sonnaje
De lo ffoturo, ca mme sceta e chiamma.
Chisto qua Màsto mio me se mmostaje,
Lo Lupo e lupecielle avea cacciate,
Pe quale Pisa a Lucca non amaje.
Co li puopole tutte nfuriate
Gualandì co Sismonde e co Lafranche
Ruggiere defenneano, ma arraggiate.
Ma appena curze mme pareano stanche,
Lo patre co li figlie, co le zzanne
Me parea de vederle dà a li scianche.
Quanno pò mme scetaje nfra sti malanne,
Nzuonno li figlie mieje co ppicce e lagne
Voleano pane, pane non trovanne.
N'arraiso tu mo si, si non te fragne,
E a chisto core mio schitto penzava;
E si non chiagne mo tu quanno chiagne?
Scetàte tutte, ll'ora se mmostava
Che lo ppane portato primma nc'era,
Perzò passata, ognuno dubbetava.
Sento nzerrà de na brutta manera
La porta de la torre; io me sosette
Senza parlà a li figlie voto cera.
Io non chiagneva, preta rummanette
Lloro chiagnevano, Anzermuccio mio,
Tu nce guarde Papà? e ch'àje? dicette.
E non chiagnette e non risponnette io
Tutto lo juorno nè la notte appriesso,
Nfì che nn'ascette n'autra vota Dio!
Comme no raggio de lo Sole a chesto
Trasette a la preggione, me specchiaje
Nfaccia a li figlie mieje lo patre stesso.
Le mmane, maro me, me mozzecaje
Chille, credenno lo facea a schiattiglia
A l'allerta llà subbeto guardaje.
Dicenno; Patre, a nuje mo te conziglia,
Si tu te magne a nuje, tu nce faciste,
Ste ccarne so le ttoje, tu te le piglia.
Me stette zitto pe non farle triste,
E stettemo duje juorne tutte mute,
Aje! nfama terra! e a che non t'arapiste?
Mperò a lo quarto juorno nuje venute,
Gaddo me se jettaje vicino nterra
Dicenno: Patre mio, tu non m'ajute?
E doppo che sto figlio me s'atterra
Vedette l'autri tre morire a ore
Dinto a lo sesto juorno 'ncruda guerra.
Ncuollo me nce menaje da affamatore
Duje juorne li cchiammaje pò doppo muorte;
La famma pole cchiù che lo dolore.
E ditto chesto pò co ll'uocchie stuorte
Pigliaje la coccia nfra de chisti diente,
E chiù che ccane rosecaje io forte.
Ah! Pisa, vetuperio de la ggente
De lo paese bello addò sì sona,
Ca li vicine contro a tte so lente.
Se movano Caprara e la Gorgona,
E l'Arno pozza ascì tutto nfuriato,
E te pozza affocà co ogne perzona.
Si lo Conte Ucolino era accusato
D'avè traduta a tte pe le ccastella,
A li figlie n'avive a dà sto stato.
Che t'ànno fatto, faccia da sportella,
Ucuccione, e lo povero Brigata,
E l'autri duje pe chesta mala stella?
Iettemo nnanze addove la gelata
A ll'autra gente nfascia attuorno attuorno,
E lo dolore che non pò ascì fora,
Trase pe dinto a te dà pena e scuorno.
Le llacreme scennenno a la mmalora
Facenno na visiera 'ncristalluta
Sotto a ll'uocchie se stanno appese ancora.
E comme che la faccia era 'ncalluta,
No nce sentea nisciuno sentemiento,
Sulo freddura nce aveva sentuta.
Mme pareva sentì già già lo viento;
Chesto chi move? io lesto addimmannaje,
Si ccà se sente ogne vampore a stiento?
E isso a me: mo jammo addò vedraje
Chello che l'uocchio te farrà resposta,
E pecchè scioscia lesto saparraje.
Uno de chille de la fredda crosta
Strellaje a nuje: oh aneme dannate
Tanto che data v'è l'urdema posta!
Lo velo da la faccia me levate
Pe fareme sfocà chisto dolore,
Primma che chisto chianto m'asciuttate.
E io: De te p'allicordarme 'ncore
Dimme chi fuste, e si te songo amico
Jarraggio nfunno a sente sbattecore.
Risponnette: Songo io Frate Arberico,
Chillo so de li frutte de mal'uorto
E mo sto nfra sto luoco aspro e nemmico.
Ah! lle dicette, tu porzì si mmuorto?
E isso a mme: Comme sto cuorpo stea
A lo munno, a la scienzia mo lo porto.
Chisto bene àve chesta Tollommea
Che spisso ll'arma nce fa sta a ccacciare,
Primma che l'Atropos la terzea.
E pecchè tu mme può ll'uocchie asciuttare
Facennome venì lo naso asciutto,
Sacce che quanno ll'arma sta a volare
Comme fice io, lo cuorpo fa no bbutto
E no demmonio pò se lo governa
Mmentre lo tiempo s'è bbotato ntutto.
E cade abbascio ccà nfra sta cesterna,
Lo cuorpo pare ancora che sta ncoppa
De l'ombra che ccà dinto cchiù m'aterna.
Tu l'àje mo da sapè si viene 'mpoppa,
Vranca d'Oria chist'è, songo cchiù anne
Da che sta 'nchiuso ccà nfra pece e stoppa.
Io credo, dicette io, che tu mme nganne,
Ca Vranca d'Oria non crepaje a li scianche,
E magna, veve e ddorme, e veste panne.
Dicette: nfra lo fuosso Malevranche,
Llà addò la pece a vollere se mette,
Nn'era ancora arrivato Mico Zanche,
Ca chisto lo diavolo mettette
Pe cuorpo sujo e de no sujo parente
Che trademiento co isso llà facette.
Ma stienne ccà la mano attientamente
Apreme ll'uocchie, e io stette cojeto;
Ca co isso è cortesia non farle niente.
Ah Genuvise, uommene de fieto
E cchine de costumme e de magagna!
Pecchè non ghiate spierze nnanze e arreto?
Che co lo peggio spireto Romagna
Trovaje uno de vuje che p'isso atterra
E nfra Cocito già tutto s'abbagna,
Tanto ca pare vivo de la terra.