Divina Commedia (Napulitano)/6
La mente mme tornaje, che se nzerraje
Nnanz'a Francesca e Paolo cainate
Quanno la faccia mia se rattristaje.
Trommiente nuove, e nuove trommentate
Me veco attuorno, comme ch'io me movo,
O me guardo, o le spalle aggio votate.
Dinto a lo terzo piano io già me trovo
De l'aterna tropeja fredda e mmardetta,
Ch'a regolarse non fa niente nuovo.
E grannene, acqua lenta, e neva jetta
Pe ll'aria, che se sta sempe scurata,
E ffa fetì la terra che l'aspetta.
Cerbaro, fera cruda e mmalorata,
Ch'abbaja llà co tre buce, e l'arme scaria
Ncopp'a la gente che nce sta ncasciata.
Co ll'uocchie russe te fa sempe n'arta
Co ventre lario e ognuto co le mmane
Scortecanno li spìrete, li squarta.
Li ffà abbajà chell'acqua comm'a ccane.
Mo da ccà, mo da llà stanno a votare,
Ca se votano spisso li profane.
Cerbaro a nnuje stette a smiccejare,
Li diente p'ammostà la vocca aprette.
E l'abbiento teneva p'abbajare.
Lo Duca mio le mmane le stennette,
E co doje vranche che pigliaje de terra,
Dinto a le bocche soje nce la cogliette.
E comme a ccane che abbajano sferra,
E s'accojeta qunno à mozzecato
Chello che pe magnarse fa la guerra;
De Cèrbaro accossì lo mmalorato
Se ficero le ffacce, e stea a stonare
Ll'arma d'ogne nzorduto sbenturato.
Passajemo pe l'ombre che a ncojetare
Stea la tropeja, e ghiettemo nfra tante
Ncopp'a l'ombre addò ognuno cuorpo pare
Stevano llà pe terra tutte quante
Fora d'una, che s'assettaje nfra d'esse
Vedennoce passare da llà nnante,
Dicette: O tu che mo te staje nfra chesse
Ombre, mo mme canusce, ca mme saje,
Tu che nasciste primma ch'io moresse.
E io a essa: chesta smania ch'àje,
Non me fa ricordà cchiù de sta cosa,
E pare che non t'aggio vista maje:
Ma dimme, chi si tu che a sta penosa
Parte te staje, e a chest'amara pena,
Ca fuorze autra nò nc'e chiù trommentosa?
E isso a me: Sciorenza che sta chiena
Tanto de mmidia, che chino è lo sacco,
Me tenette nfra la vita screna.
Me chiammasteve vuje lo Sio Ciacco
Pecchè magnava assaje a la sprovvista
Mo comme vide a la tropeja m'ammacco.
E io ccà non so sola anema trista,
Ca tutte chiste a tale pena stanno,
Ch'ànno pigliata chesta stessa sbista!
Ciacco, mme pesa assaje mo chist'affanno,
Lle risponnette, e chiagno a sta sentenza,
Si saje, dimme, pecchè venarranno
Tutte li citatine de Sciorenza,
Si nc'è quaccuno justo, e a che nfracasse
Lo puopolo se stace a la perdenza?
E isso: nfra tre anne de sconquasse
Venarranno a la guerra, addò la Nera
Parte nne cacciarrà la Janca 'nchiasse;
E chesta cadarrà de na manera
Nfra tre anne, che l'autra jarrà mpoppa
Pe Carlo Valoà co l'arma nera.
E a commannà la Nera sarrà troppa,
E a voglia soja li Janche avrà mettute
Comme a li policine 'nfra la stoppa.
Juste so duje, ma non so sentute,
E songo nfra li core comme a ffuoco,
Superbia, Mmidia e Avarizia jute.
E ccà fenette, justo, pe ddà luoco
A chesto parlà mio: Mparame ancora,
E parla mo co mmico n'autro poco,
Farenata e Tegghiaja, che ognuno annora,
Jacopo Rusticuccio, Arrico e Mosca,
E ognuno che de gran talento addora.
Dimme addò stanno, e ffà che li canosca,
Ca tengo lo golìo de sapere
Si stanno 'nfra lo 'Nfierno che li'nfosca.
E isso: Stanno mmiezo a ll'arme nere,
Pe grossa corpa stanno a lo sprofunno
Si tu nce scinne, li ppotraje vedere;
Ma si pò tornaraje a chillo munno,
Te prejo che a n'autra mente tu mme puorte;
Io cchiù non dico, e cchiù non sputo tunno.
E l' uocchie suoje deritte fice stuorte;
Calaje la capo, e fice na guardata
Cadenno mmiezo a li cecate muorte.
Lo Duca a mme: Cchiù non starrà scetata
Primma de chillo suono de la tromma.
Che pe isso Cristo l'avrà jodecato:
Ognuno tanno 'nzeportura nghiomma
Pigliannose la carne e la fiura,
Sentenno chello che p'aterno assomma.
Acossì llà passajemo la mestura
De l'ombra, e de chell'acqua a passe lente,
Parlanno assaje de la vita futura;
Pecchè io dicette: Masto, sti trommiente
Sarranno cchiù doppo la gran sentenzia,
O sarranno cchiù poche, o cchiù cocente?
E isso a mme: Recordate la scienzia,
Che l'ommo quanno à la capo perfetta,
Sente lo mmale o bene de coscienzia;
E simbè chesta gente ch'è mmardetta,
De paro passo tutta non bà maje,
Da llà, cchiù che da ccà essere aspetta.
Chella strata co isso io llà giraje,
Parlanno assaje, e cchiù de quanto dico;
E arrivato a lo punto de li guaje,
Teccote nnanze a Pruto lo nemmico.
O forza! o forza de nu Sautanasso!
Co voce cupa Pruto stea alluccare,
E chillo ntiso tutto nchillo passo,
Mme dicette pe starme a confortare:
Chill'ommo llà paura non te faccia,
Forte comm'è ccà te farrà calare.
Pò s'avotaje a chella brutta faccia,
Dicenno: statte zitto lupo mio:
Tutta l'arraggia dinto a tte nne caccia.
De ire a lo ccupo avimmo nuje golìo;
Se vo accossì llà ncoppa, addò Michele
Cacciaje lo rebbellato contro a Dio.
E tale e quale ad abboffate vele,
Che cadeno si l'albero è spezzato,
Cade accossì la fera assaje crudele.
Dinto a la quarta scesa io fuje calato,
Piglianno cchiù la riva de li chiante,
Che lo mmale de tutte àve adunato.
Ah! Ghiostizia de Dio! Chi stipa tante
Fatiche e ppene, quante nne vedette?
A che la corpa strazia tutte quante?
Comme a Caridde, nega ll'arriciette
L'onne che rompe, quanno a n'autra ntoppa,
Ccossì la ggente ad abballà se mette.