Divina Commedia (Napulitano)/8
Primma che nuje fosseme arrevate
Abbascio de la torra, a ccammenare
La cimma nuje guardavamo affannate
Pe doje sciamme che llà stevano chiare,
E pe n'autra, a nuje lontano a siesto,
Ch'appena l'uocchio la potea guardare.
E votato io a Vergileo lesto lesto,
Disse: Chesto che dice? e che risponne
Chell'autro ffuoco, e chi facette chesto?
E isso: Ncoppa de le ffetente onne
Già può vedere chello che s'aspetta,
Si ccà la neve non te l'annasconne.
E comme se vedesse na saetta
Che va pe l'aria co la fujarella,
Mme vedette io pe nnante na varchetta.
E llà assettato steva dinto a chella
No briccone che nce venea strellanno,
Ma forte; Si arrevata, anema fella?
Fregiasso, t pe niente staje alluccanno,
Vergileo le dicette assaje pracato,
Tu nce avarraje, lo fango ccà passanno.
E comm'a chillo, che si è coffejato
Se nfuria e a rosecà lesto se mette,
Freggiasso se facette, ma stezzato.
Dinto a la varca lo Duca scennette,
Llà dinto appriesso a isso mme chiammaje,
E quanno nce jette io chiena parette.
E stevamo llà dinto, ed io guardaje
Che l'onna llà se perde e corre nnante;
Chello che a ll'autra gente non fa maje.
E pò correnno nuje l'acqua stagnante
Chi sì che viene ccà? n'ommo diceva
Nfangato, che se fice a mme da nante.
Si vengo non ce resto, io risponneva;
E tu chi si, addimmanno, tanto brutto?
E isso m'ammostava che chiagneva.
E io a isso: co llacreme e lutto
O Spireto mmarditto tu rummane;
Te canosco, pecchè sporcato tutto.
E a la varca stennette isso le mmane;
Pecchè lo Masto accuorto lo cacciaje
Dicenno: Va te miette co autri cane.
Co le braccia lo cuollo m'acchiapaje
E mme vasaje dicenno: Arma sdignata,
Io benedico a chi te ggeneraje.
Fuje a lo munno perzona vantata:
E si te l'allicordo è cosa male,
È accossì l'ombra soja ccà nfuriata.
Quante stanno llà ncoppa Princepale
Comme a ppuorce, ccà dinto a la monnezza
Starranno, o a lo pantano tale e quale.
E io, Si Masto, famme la finezza
De li ffà ntra lo fango mbroscenare,
Primma ch'ascimmo mo da sta bruttezza,
E isso a mme: primma de fa guardare
A tte la prova, restarraje tu sazio:
Chisto golìo io t'aggio a ffà passare.
Doppo chesto vedette chillo strazio
Fare de chisto a le ffangose gente;
Che a Dio nne faccio laude e lo dengrazio,
Tutte strellavano : A Felippo Argente:
Che mmiezo lo cerviello nce perdette,
Che nfra d'isso votava co li diente.
Ccà lo lassajemo, e chiù non ne dicette,
Io che sentette forte no dolore,
E ghieva nnanze, e l'uocchie llà arapette.
E lo Masto dicette a sto rummore:
Mo vene la Cità, che à nomme Dite
Co chille, ch'ànno ruospe int'a lo core.
Ed io: Si Masto già le soje meschite
Llà dinto a chella valle de pepierno
Io veco rosse pe tutte li site.
E mme dicette: ccà lo ffuoco aterno
L'affoca dinto e ffà parerle rosse
Comme tu vide a chisto vascio 'nfierno.
Arrivajemo pò dinto a le ffosse
Ch'erano nchella terra sconzolata:
Na muraglia parea, che fierro fosse.
Non senza primma farce na girata
Arrivajemo addò, strellava forte
Lo marenaro: ascite, ccà e la strata.
Vedette mille e cchiù ncopp' a le pporte
Chiovute da lo cielo, e' mpertinente
Diceano: chisto chi è, che senza morte
Va pe lo regno de la morta gente?
E lo si masto mio le fece segno
De volerle parlà segretamente.
Se ficero passà tanno lo sdegno
Dicenno: ma tu sulo e non già chillo,
Che trasìe facce-tuosto' nchisto regno.
Se ne tornasse arreto sto nennillo
Accossì prova si ccà restarraje
Ca o portaste pe a via de lo tentillo.
Penza lettore se io me sconfortaje
Sentenno le parole soje mmardette:
Che non credette de tornarce maje.
O caro Duca mio, che chiù de sette
Vote contro a ppericole m'àje strinto,
E che cchiù sicurezza pò n'avette,
Nò mme lassà, diss'io, accossì vinto:
E si de jì cchiù nnante m'à anniato
Priesto allippammoncenne da ccà dinto.
E chillo llà che llà m'avea portato
Mme disse: Si sbagliaje sto passo ntunno
De levarce nisciuno nò nc'è dato,
Mo ccà m'aspetta e statte frisco e tunno
E spera cosa ccà che te recrea
Ch'io non te lassarraggio 'nchisto munno.
Lo Masto se ne va, co la tropèa
Io resto, e ffa chiù niente non sapeva,
Lo no, e lo si a le chiocche me ronnèa.
Non può sapere chello ch'io diceva
Ma isso tiempo assaje llà non nce stette,
Ch'ognuno llà provare lo voleva.
Le pporte ognuno priesto llà nchiudette
Nfaccia a lo Masto mio pe farle danno
Che fora, appriesso a me, se rummanette.
Co l'uocchie nterra, e tutto sospiranno
Diceva, neh chi è ca cheste ccase
De chianto m'è venuto mo annianno?
E a mme: n'avè paura sì rummase
Nce ànno ccà fora, pecché io mo tento
La prova anfì che l'aggio perzuase.
Non è nova sta cosa che mo sento,
Che l'ausajeno pure a n'autra porta
Che non se chiude da cient'anne e ciento.
Vediste 'ncoppa d'essa tu la morta,
E mo pe ccà già a scennere pe l'erta
Sta n'Angelo passanno 'mbona sciorta,
E pe isso a nuje la porta sarrà aperta.