Divina Commedia (Napulitano)/Vita de Dante
VITA DE DANTE
SPALEFECATA A LO POPOLO
Da na famiglia nobbela de Romma, a nomme Frangipane, nascettero Sant'Ambrosio, ed Eliseo, che doppo la ristaurazione di Sciorenza fatta da Carlo Magno, venette dinto a sta cetà e alloggiaie vicino a Donati e a Pazzi che erano doie nobbelisseme famiglie sciorentine: chille che venettero apprieso a sti Frangipane e de la stessa razza se cagnaieno sto nomme e se mettettero chillo d'Eliseo. Nfra de chiste nce fuie no cierto Cacciaguida, ch'avette pe mogliera na signora de Ferrara chiammata Aldighiere, da la quale n'avette no figlio, e nce mettette lo nomme de Aldighiere.
Da chisto nascette Dante, a lo 1265 a Sciorenza, e fuie vattiato co lo nomme de Durante, che pò p'abbrevià la parola fuie ditto Dante.
Nfì da quanno Dante era guaglione ammostava de sapè fà gran cose, e teneva no talento tanto straordinario, che faceva maraviglia a tutte chille che lo canoscevano. Arrivato a la gioventù se nnammoraie de na figliola chiammata Biatrice, la quale era figlia de no cierto Folco Portinari; la quale Biatrice se ne morette a li 9 giugno 1290, senza che Dante se l'avesse potuta sposà, anze nce screvette paricchie belle canzune, e la mettette dinto a lo libbro suio, e n'avette tale e tanto dispiacere de la morta soia, che chiagneva iuorno e notte pe lo dolore.
Non se pò dicere quanto e comme a Dante nce piaceva de studià, speciarmente pe la poesia nce ieva pazzo, avenno pe Masto de Scola suio a no cierto Brnnetto Latini, ommo assaje addotto, ma ruzzo. Studiaje pure le mmatemateche, la filosofia fiseca e morale, e se dilettaje pure de museca. Chello che cchiù v'à da fa maraviglià si è che Dante fuje pure guappo sordato, e mmiezo a la battaglia de Campaldino facette annore a isso stesso e a la patria, tanto commattette co coraggio e valore.
Se pigliaje pe mogliera a na cierta Gemma de la famiglia Donati, la quale fuje tanto contraria a li costume suoje, che doppo averne avute duje figlie, ne l'avette da mannà n'autra vota a la casa soia.
Mmiezo a li govierne de lo stato fuie assaie sincero, e a l'aità de 35 anne fuie annommenato Priore [1].
Ma pe ntramente Dante aspettava bene pe lo bene fatto a lo paese suio, n'avette male, pecchè avette la condanna de l'asilio.
Allora li Guerfe [2] stevano spartute nfra Janche e Nire [3] e volenno Dante mettere pace e concordia nfra de lloro, se retiraie da l'ammenestrazione de la Reprubbeca, ma forzato da li pariente suoie s'avette d'assettà n'autra vota ncopp'a chella seggia che aveva lassata pe disperazione.
Nfradetanto sentite che succedette: li Cape-puopolo de lo partito de li Nire, vedenno che li Janche la vincevano ncuollo a lloro, se riunettero tutte quante dint'a la Chiesia de la Ternità, addove, doppo no sacco de chiacchiere, fracasse, appicceche e revuote se conchiudette de cercà a lo Papa d'allora, che se chiammava Bonifacio, de mannà na perzona de sango riale a chella città pe governarla.
Sta cosa dispiacette assaie a Dante, che senza permesso lloro s'erano aunate dint'a no luoco privato pe vedè chello che s'aveva da fà pe lo paese. Allora nzieme co li compagne suoie, Dante resolette de mannà fora asiliate — Corso Donati, Geri Spina, Giachinozzo de li Pazze, Rosso de la Tosa, e ciert'autre Principe Nire; de la parte Janca furono connannate
Gentile, Torrigiano de' Cerchi, Guido Cavalcante, Baschieri della Tosa e Baldinaccio Adimari.
Dante, doppo poche autre iuorne da che succedette sto fatto, fuie mannato come Ammasciatore a lo Papa, e vedenno che ghiennosenne isso da la cità le ccose restavano tutto combussolate, dicette, credenno de non essere sentuto:
- Se io resto chi va? Se io vaco chi resta?
pecchè li compagne suoi le facettero ntennere ca senza d'isso la reprubbeca sarria stata arroinata.
Tornato dint'a la cità Corso Donati, se formaie no tale partito, che accoppaie Dante, e lo mmannaie asiliato, comme iusto aveva fatto co isso, e nzieme co Dante fuieno asiliate tante e tant'autre, e fuieno porzì sequestrate li bene lloro.
Ora avenno Dante tentato tutte le bìe pe mettere pace nfra li nemmice suoie, e vedenno a la fine che non ne cacciava niente, ca chille erano chiù tuoste de lo cuorno, fucete comm'a lo cuorno, stuorte comm'a lo cuorno, s'aunette co l'autre asiliate, e fatto Capitanio a no cierto Alisantro Conte de Romena, tentaieno de tornà a Sciorenza pe forza; ma non succedenno chello che lloro s'avevano miso ncapo, se ne tornaieno arreto, e Dante fuie ricevuto da Can Granda della Scala, signore de Verona. Dante nce fuie amato, riverito, e stimato, e isso nce lassaie la discennenzia soja, la quale non se chiammaie cchiù Aldighieri, ma Dante, quale famiglia de Dante a tiempe nuoste non à restato cchiù nisciuno discennente.
Ntramente dante steva asiliato a Verona screvette cchiù vote a Sciorenza ne poterece tornà, ma vedenno che manco ne cacciava niente se ne iette a Parigge, addove, co tutto che steva sfasulato, accommenzaie a ddà leziune de felosofia e de tiologia, e ntramente ca isso co cheste leziune faceva meraviglia, passanno Arrico Mperatore pe l'Italia, le venette n'autra vota voglia de tornà a lo paese suio, e venuto dint'a l'Italia consigliaie lo Mperatore de fa guerra contro li Sciorentine. Ma chesto manco le iette pe deritto, pecchè chillo Mperatore se n'avette da scappà a no castiello Buonconvento vicino Romma, addò morette.
Dante se ne iette a Ravenna, addò fuie ricevuto co no sacco d'alliccasalemme da Giudo Novello, signore de chella cità, e nce lassaie la vita a 56 anne, a lo mese de luglio de lo 1321.
Cierte signure chiammate da Polenta facettero mettere lo cuorpo de Dante dint'a na bella seportura.
Dante fuie de mezzana statura, de faccia no poco longa e d'uocchie gruosse e de naso aquilino. Lo colore de la faccia era brunetto, la varva e li capille erano nire e ncespecate.
Dinto Santa Croce de Sciorenza nce sta lo ritratto suio fatto da Giotto.
Dante mangiava poco, e vesteva co sempricità, e era tanto curiuso de leggere cose, che avenno avuto pe rialo no libro dinto a na festa de ballo, subbeto se mettette a leggere, e non sentette e non vedette cchiù niente de chella festa.
Screvette assaie belle cose, nvierze e mprose, a lengua latina e a lengua taliana, ma chello che cchiù le fà annore è la magnifeca Devina Commeddia.
Isso l'accommenzaie a scrivere primma che fosse asiliato ca n'aveva scritte sule sette cante, lo riesto lo fenette de scrivere a l'asilio. Ma l'urdeme cante de lo Paraviso, rummanettero annascuse dinto a na parte secreta de la casa soia, quanno morette: chisti cante che non se trovavano erano assaie desiderate da tutte quante chille che leggevano lo libbro.
Ma l'ombra de Dante comparette na notte arravogliata dint'a no lenzuolo a lo figlio suio chiamato Jacopo, ntramente steva dormenno e l'ammostaie lo luoco, addò stevano annascuoste li Cante che mancavano a l'opera.
Lo giovene se scetaie allora, corrette a chillo luoco, e trovaie chello che l'aveva ammostato l'ombra de lo patre; lo stampaie e felicenotte.
- ↑ Non ve credite mo che sto Priore fosse stato comm'a Napole è no Priore de Congrazione, gnernò; allora lo Priore era uno de li Cape de la Reprubbreca de Sciorenza.
- ↑ Li Guerfe e li Ghibelline erano duie partite de lo popolo de Sciorenza. Li Guerfe jevano appriesso a lo Papa, a li Muonace e a li Prievete. Li Ghibelline la penzavano a lo contrario e se mettettero da la parte de lo governo de la reprubbeca. Nzomma li Guerfe erano riazzionarie, e li Ghibelline erano libberale, e lo stesso Dante fuje isso stesso Ghibellino, e pecchesto fuje asiliato.
- ↑ Nfra le primarie famiglie de Pistoja nce ne steva una chiammata Cancellieri. Succedette no juorno che duje de sta famiglia venettero a le mmane, Lore e Geri. Geri restaje appena appena feruto. Gugliermo, patre de Lore, n'avette no dispiacere gruosso assaje e obbricaje lo figlio a ghì a cercà perduono a lo patre de chillo che isso aveva feruto, pe non fà succedere no scannalo dint'a la cità. Comme nfatto lo giovene jette addò lo patre de Geri, ma chisto le facette taglià la mano deritta, dicenno: Torna addò pateto, e dille ca le fferute se mmedecano co lo cortiello, non già co le parole. Allora tutta Pistoja s'armaje, e accossì se facettero duje partite, uno pro, l'autro contro, e se chiammajeno li Janche e li Nire, cosa che avette da fà pure Sciorenza pe necessità. Li nire protette da Corso Donati, lo facettero Capo lloro; e li Janche p'avè pure lloro n'appoggio, facettero Capo a no cierto Vieri de' Cerchi. E comme cheste doje famiglie non se potevano vedè accossì se jevano l'una contro de l'autra, e li duje partite fujeno sempe ditte li Janche e li Nire.