La Vaiasseide/Canto Tierzo
ARGOMIENTO.
|
CANTO TIERZO.
S
Cumpela susso dimme s’auto riesto
Madamma Musa mia cara, e comprita
Ca se si fredda te faccio no tiesto
Perzò me conta commo io la Zita,
Già Pretiosa à l’ancorenno, e priesto
La mamma n’havisai madamma Rita
Commo essa à l’hora bona è mmaritata
Viammola contenta, e conzolata
La vecchia che la nova ntesa bavette
Pe lo gran prieio s’appe à shevolire
E priesto a li pariente lo decette
Perchè à la festa vogliono venire,
Subeto no corriero le facette.
O Musa frate aiutamello à dire,
Ch’à dire tanta nure, e cumpremiente
Se nfettaria na nave de pezziente.
Essa acchiettaie chiù de na cosella
Commo à dicere mò no cantariello
Na caudara, no spito, na tiella,
Na scafareia, na scopa, n’agliariello,
No trepete, no tiesto, na scotella,
No cato, na porpara, e no teniello,
E na cestella po zeppa si ncoppa
De cocchiare, conocchie, fusa, e stoppa.
L’apparecchiaie dapò madamma Lisa
La sogra de la Zita pe le dare
De tela de Bertagna na cammisa,
No paro de cauzette verde mare,
De tarantola, e tre parme de frisa,
Co no coscino pe nce lavorare,
E mille marcancegne, e scartapelle
Scarpe, chianielle, scuffie, e zagarelle.
Ma Cienzo se ncignaie no vestito
De panno de Gragnano verde vaie
E ieva alla smargiassa tanto ardito,
Che pareva (isce) non vedisse maie,
Onne uno canoscea ch’era lo Zito,
E le dicea, e bè che festa faie?
Isso decea, cosè che mai vedisse
Se tù vossegnoria me favorisse.
Io songo (onne uno) disse apparecchiato
Pe te faurire, ca pò vossoria
Me serverite quanno sò nzorato,
Ed accossi na bella compagnia
Appero chillo iuorno conzertato,
Ch’onn’uno propio mmiezo à chella via
Accranaccato à n’aseno venesse
E na Papara po se nce corresse.
Ntra tanto Pretiosa non dormette,
E fatto s’appe no vagno topiello
De ferrannina gialla se vestette,
E co lo filo po marfetaniello
Li pile de la facce se radette,
E co lo solemato, e lomenciello,
Verace, armiento, canfora, argentata,
Se fece bella à l’uocchíe de na fata.
Nante cunnale havea de silonnente
Co no pezzillo nponta à francetella;
E no ntruglio de vrito pe pennente
Che mponta nce tenea na campanella.
E perche havea chiù vote puosto à mente
A Donna Petronilla spagnolella
Essa voze perzì lo manteglino
Ch’era de cordellato fino fino.
E ncrosione pe no ve tenere
Pesole, quanno foro ngaudiate
Iezero tutte à tavola a sedere
Dove se foro bone satorate,
A le fenestre po iero à vedere
Li corzeture ch’erano arrenate
Co certe mprese ch’erano à modiello
De chelle de Vargagha, e de Rusciello.
La festa se faceva à la Chiazzetta
Luoco pe chesse propio fatto à posta,
Perch’eie larga, longa, chiana, e netta,
Che schitto pare fatta pe la iosta,
Onne uno canna apierto l’hora aspetta,
E dove stà la pappara s’accosta:
Ma chi non voze folla, ed appe agresta
S’allogaie na decinco na fenesta.
La primma che venette fù Petella
Sore carnale de no cacciavino,
Ch’havea na faccie ianca, rossa, e bella,
Che copeta parea de lo pennino,
Portava de Gragnano na gonnella,
E no ieppone viecchio d’armosino,
Co no corzetto po co la granniglia
Che fece à chiù de quatto auza le ciglia.
Pimpa po venne figlia à la mammana,
O mamma mia che uocchio à zennariello?
Na rrobba havea de capisciola, e lana
A la ntrellice commo terzaniello,
Teneva schitto quanto na campana
Na vozzolella ncanna, e no scartiello,
De lo riesto era tutta saporita,
Che n’appe gelosia quase la Zita.
Appriesso à chessa Iovannella ionze,
Che se bè haveva n’uocchio scarcagnato
A lo banco tenea chiù de seie onze
E chiù d’uno nce havea l’uocchie appizzato
E ’ntrà l’autre uno che vennea caionze,
Ieva muorto ped essa, e spantecato,
E tanto chiù mò se ne iea mbrodetto.
Ca portaie na camorra de dobretto.
Con chessa accasione s’affrontaie
Co Pantullo la figlia de Rinella,
Che non s’erano viste ch’era assaie,
E adesa ne sperea la poverella,
Co l’uocchie l'uno à l’auto se parlaie,
Ma essa non capea dinto la pella,
E pe darele subeto no vaso
L’appe à cacciare n’uocchio co lo naso.
Ch’era tanto la folla de la gente,
Che lo vasaie senz’essere veduta
Ed isso puro potte allegramente
Darele quatto vase à la sfoiuta,
Ma ecco lo scurisso ca se sente
Tutta la vocca de ianchetto nchiuta,
Tanto che le fo forza pe dolore
Correre à Mastro Paulo nciarmatore.
No mariuolo nchesto co doie deta
A chella folla ne zeppoleiaie
Da na vaiassa na vorza de seta,
Che mille scartapelle nce trovaie,
Che se bè dinto non nce ashiaie moneta
Ncerano robbe da magnare assaie,
Zoè mela, castagne, e arravogliata
Na carta straccia de sonzeverata.
Essa se n’adonaie, e foro tante
Li strille (terra tienete) che ciento
Le corzero dereto pretiante,
Ma chillo se ne ieze commo à viento,
Para piglia deceano tutte quante,
Para ste brache, io creo c’havea l’agniento
De le ianare, pocca nmiezo à chelle
Gente volaie commo s’havesse ascelle.
E fù tanto l’allucco, e lo gridare
De ciento porta robba, e peccerille
Che nce voze doie hore pe acquetare
La illaio, la baia, e tanta strille,
Ma da pò che scompero de se dare
Spettoiune, e shianchette chiu de mille,
Quanno se fo la chiazza arresettata
Li iustrature fecere la ntrata.
Lo Zito ch’era lo mantenetore
S’havea fatta na giubba à la torchesca
De carta straccia, ed era de colore
De foglia molla couta fresca fresca,
E no tagliero haveva de buono adore
Pe parte de na taracha moresca
Co na cepolla penta, e po na scritta
(Sò forte cruda, ma sò doce fritta.)
Dereto ad isso po venea Pacione,
Che vestuto s’havea de zegriniello,
E tenea scritto ncoppa no pallone
(Ammore che m’abbotta e sghizzariello)
Veneva appriesso ad isso Menecone
E nmiezo de no culo de tiniello
Havea na vorza d’oro, e seta ianca
Co no mutto spagniuolo (Non haie blanca).
Pò venne Tonno, che de cordovana
Portava no ieppone ragamato,
E no cauzone de tela bottana,
Tutto de filo ruggio repontato,
E portava no pettene de lana
Co chisto mutto, (Ammore m’hà cardato,)
E iea ncoppa na varda de manera,
Ch’ad onnuno parea vuto de cera.
Da pò chisso venea tutto vestuto
Mase, de cannavaccio ncelentrato,
E ncoppa no tompagno de liuto
No truocchio, co na meza havea pintato
E no mastro de scola assaie saputo
L’havea chisto mutto sfrocecato,
(Havere à canto muliere bella
Sine cerere, e Bacco frietella.)
Titta venette pò lo cchiù galante,
E fù cierto lo nore de la festa,
Perchè isso schitto portava li guante
Co li stivale, e n’albernuzzo ntesta,
E fù la mpresa soa propio d’amante
Na vita, no varvetta, e na rapesta
Co na lettera scritta à marzapano,
(Rape sta vita mia core de cano.)
Venettero perzì Ciullo, Masillo,
Pizio, Meo, Peppo, Tonno, Cicco, Nato,
Cola, Nardo, Pione, Lello, e Millo,
E lo shiore de Puorto, e lo Mercato,
Onne guarzone, ed onne peccerillo
Steva pe na corzera apparecchiato,
Ma passiato ch’appero à lo tuorno
Corze lo Zito à suono de no cuorno.
La papara era grossa, ed havea ontato
Tutto quanto lo cuollo de sapone,
Perzò lo Zito non nce l’hà sciccato
Nè nesciuno auto de chelle perzone,
Perche da mano à tutte è sciuliato
Restanno co no parmo de nasone,
E tanto fù la illaiò, e l'allucco,
Che se sentio da Trocchia à Castrocucco.
Lo Zito mo decette mazza franca
Da ccà, e da llà, frate tornammonella
Ca se chesta vranzolla non me manca
Penzo sta botta de sceccarennella,
Ma Ciullo à mano ritta, e à mano manca
Tenette mente, e non vedenno chella
Carmosina zoè, che stea mpresone
Non fece de la trippa corazzone.
Ma co na zirria granne resoluto
De non campare cchiù lo poveriello,
Chiavaie no bello spruoccolo appontuto
Propio sotta la coda à l’aseniello,
Che manco se no spireto trasuto
Le fosse (arrasso sia) ne lo vodiello
Tanto corze, e zompaie, fi che da duosso
Lo sbalanzaie de pesole à no fuosso.
Ma lassammolo stare à chello bruoco,
Ca la Sciorta le fù sore carnale,
E tornammo à la fine de lo iuoco
Ca s’io trico lo Zito l’have a male,
Isso commo no furgolo de fuoco
Pigliaie na corza, e de manera tale
A doie mano afferraie la paperella,
Che le scippaie lo cuollo, e meza scella.
Lloco fù no remmore accommenzato,
Che lo Munno parea ire à roina,
Li sische t’havarriano scervellato,
E duravano fino à la matina,
Se non ch’a chesto miezo vrociolato
Se n’era Ciullo dinto la cantina,
Perzò scompio la festa, e la preiezza,
E deventaie sciabbacco l’allegrezza.
Chi à la faccie se fà mille rascagne,
Chi la varva, e le zeruole peleia,
Chi stordesce li vuosche, e le campagne,
Tanto pe doglia strilla, e voceteia,
Chi à pisciariello, e chi à felluzzo chiagne
Tanto ch’ogn’uno regnola, e gualeia,
Tutte credenno mo ca Ciullo è muorto,
Ma isso, e Carmosina è quase mpuorto,
Pocca à chella medesemo cantina,
Dove ieze à cadere stea presone,
Chella ch’era lo nore de cocina,
E l’havea spertosato lo permone;
Ma commo canoscette la meschina,
Mentre era tutta tenta de cravune,
E commo scero po da chello stritto
Ve lo dico mò mò se state zitto.
Scompetura de lo Tierzo Canto.
