Chesta paggena è stata leggiuta du' vote e mo è fernuta.
ATTO UNICO
A
Gerolamo Rovetta
SCENA 1.a
D. Sofia e Crescenzo
(D. Sofia è seduta su di una poltrona, con parecchi guanciali dietro la schiena; è pallida, sofferente. Crescenzo le siede vicino e cerca di confortarla).
D. Sofia (con un filo di voce). É fenuta pe me!... Mm’ ’o sento!...
Crescenzo. Vattenne, ca finchè c’è vita, c’è speranza.
D. Sofia (con tristezza). ’O ssaccio... Tu comme haie ’a di’, pe mme dà curaggio? Rieste vidovo, nun ce penzà, e te puó spusà a ’Nnarella cu ’e denare mieie.
Crescenzo. E sempe ’a stessa canzona!
D. Sofia. Tu ’a vuó bene a ’Nnarella... e chi sa si nun so’ state ’e ghiastemme soie!...
Crescenzo. Tu qua’ Nnarella ha fatto a te!...
