Chesta paggena è stata leggiuta du' vote e mo è fernuta.
II.
Pigliatevillo! Non sarrà na rosa,
nun sarrà no carofano schiavone,
non sarrà na camèlia prezziosa,
ma sarrà sempre chino ’e spressione!
È comm’ ’a Musa mia: Musa scornosa
ca s’annasconne senza cante e suone,
ma sente ’npietto fuoco ’e vero ammore:
si è brutta ’e faccia tene bello ’o core….
III.
Accompagna ’e soldate, tale e quale
comm’ ’e scugnizze appriesso ’e reggimente,
nnanz’ ’a fanfarra, attuorno ’e capurale,
facenno capriole a ciente a ciente…
Lloro, pe ncopp’ 'o Campo e p’ ’e Casale,
io, nfino a mmiezo ’e Turche, ore e mumente,
e veco ’e frate miei ca fanno ’a guerra
e ’a Mezaluna scarpesata nterra!
— 20 —
