Paggena:'E Lluce-luce.djvu/10

8

Poesie

E 'nce steva 'na vota 'na Riggina
ca teneva 'e capille a ffilagrana
e pe' nennella 'e ll'uocchie 'na turchina.
Chiammata 'a figla d' 'a stella Diana,
cchiù d' 'o sole, affacciannose 'a matina,
luceva 'a baracunata e 'a perzïana...
'A ggente, attuorno, se faceva 'e ccruce:
«Comm' 'a Riggina luce 'e 'sta manera?»

Ma... luceno cchiù assaie 'sti lluce-luce
ca luceno p' 'o lémmeto stasera...


Ma n'ata cosa ca luceva tanto
i' ll'aggiu vista... e nun m'è 'ndifferente...
Core, n'ê fatto ca n'ê fatto chianto
'a sera che vediste — tiene a mente? —
aggumpagnà 'na morta a 'o Campusanto...
'A ggente, attuorno, tutta quanta 'a ggente
murmuliava e se faceva 'e ccruce...
E... ciento torce... annanze 'a cotra nera,
lucevano cchiù assaie d' 'e lluce-luce
ca luceno p' 'o lémmeto stasera...