Chesta paggena è stata leggiuta.
105
Core e penziero
«Dice a tatillo...
Ca nun partesse... Tu si’ piccerillo;
meglio c’ ’o ddice tu, ca nce ’o ddico io...
Che parte a fa? Mo’, populo e signure,
nun credono cchiù a Dio!
E ’sti nnuvene nun ’e vvonno cchiù!...
Mo’, che te pienze?...
’0 pasturaro nun fa cchiù pasture...
’0 spezziale nun venne cchiù ’ncienze!
Chella notte nun vide ’nu bengale...
Nun se sparano botte...
E’ fernuto Natale! E cu’ Natale
se no so’ ghiute tanta cose belle!...
Mo’ chi canta, a’ viggilia, a mezzanotte:
«Tu scendi dalle stelle — o Redentore»?
Manco ’e guagliune! Ca mo’ fanno ’ammore
e nun ’a vonno sentere ’a Nuvena!...
Pirciò stateve cca... Ca i’ nun me sbaglio!...»
E ’o ninno... ’ngotta!... Penza a Filumena.
Ll’aveva prumettuto ’nu sciucquaglio!
