Ma già Donna Gaitana, pecché nun è risposta,
c’ ’o fierro mmano... ’e leva, se ’mpizza ’int’ ’a cucina
e fa ’nfaccia ’a bardascia:—Giesù, che faccia tosta!
Giesù, che culumbrina!
E comme? Te si’ misa ’mbarcone ll’ore sane,
addo’ ca zi’ Pascale poc’ato e se retira?
Pulézzela ’a muntura... Cácciale ’e Prussiane...
Ca zìeto nun se fira!
E Grazia chiagne e penza: «Ciento ducate ommeno...
Trasesse ’int’ ’o cummento d’ ’e mmonache ’o Bammino!
Ma chi m’ ’e dà? Nun tengo pe’ n’accattà veleno,
nemmanco ’nu carrino!»
Quann’ ’On Pascale Pástena s’affaccia sott’ ’a porta...
«Bella ’e zi-zio, nun chiagnere... Pecché chiagne accussì?...
—Gnernò... nun chiagno... È ’a póvera...—Pecché zi-zio te porta.
si tu ’nce vuo’ venì...
— Ce voglio? Che ve pare?! Ce sto tanta ’nganata...
’Na festa accussì bella! Sulo vurria vedé,
sibbè ’nnante Palazzo, quann’è ch’esce ’a Parata,
chi trotta affianco ’o Rre...»
Paggena:'E Lluce-luce.djvu/120
Chesta paggena è stata leggiuta.
118
Poesie
