Paggena:'E Lluce-luce.djvu/14

Chesta paggena è stata leggiuta du' vote e mo è fernuta.
12
Core e penziero


Quanno tenevo 'a mazza pasturale,
'a mitria, 'a cotta, 'e ffrasche, 'e canneliere,
l'ardarino c' 'a cupula, 'o 'ncenziere,
'o Sacramento, 'a Piseta, 'o Messale...

E facevo 'o Presebbio ogne Natale...
E tutte 'e sorde n'accattavo cere.

Tanno veneva 'a Serpa int' 'o curtiglio,
che cuntava: «Nce stava 'nu rignante
ca teneva a 'nu figlio; ma 'stu figlio
'na vota fuie pigliato d' 'e brigante...

Ca screvettero 'o Re: Manna ncuntante,
ciento ducate... e nu' piglià cunziglio.

—Quant'anne tiene?—N'ati ttre pe' cciento—
Me rispunneva 'a Serpa schianchinata.
—E ch' 'è visto p' 'o munno, 'a che si' 'nnata,
tu ca vai sempre sperta a nneva e a vviento?...

—E c'aggiu visto?—rispunneva—Stiento!
Che puteva vedé... si so' cecata?!