Paggena:'E Lluce-luce.djvu/21

Chesta paggena è stata leggiuta du' vote e mo è fernuta.
19
Core e penziero



'NA FUNTANA


Sott'a fenesta mia 'nc'è 'na funtana
che scorre sempe, d' 'a matina a' sera,
che s'allamenta 'na nuttata sana.

Bella figliola spruceta e luntana,
è accussì ddoce 'o suonno 'e primavera;
ma i' nun dormo pe' mezzo 'e sta funtana.

Canta 'nu gallo... Sona 'na campana,
e i' conto ll'ore, senza truvà abbiento,
comme all'acqua che scorre 'a 'sta funtana.

Stanotte, siente, se so' data 'a mana
ll'acqua che scorre e 'a zinfunia d' 'o viento...
e aggiu passata 'na nuttata cana!

Gesù, 'sta casa mia comm'è stramana!
E 'nce vuleva 'stu lamiento acuto...
Nun 'a ponno asseccà chesta funtana?

Passa nu' jorno, passa 'na semmana...
e i' nun te veco... e 'o tiempo va perduto
comm'all'acqua che scorre 'a 'sta funtana.