Paggena:'E Lluce-luce.djvu/26

Chesta paggena è stata leggiuta du' vote e mo è fernuta.
24
Poesie


'nu cupertino giallo cu' cierti striscie blù,
e sciarpe... e nnocche.. e rrobba ca nun se porta cchiù;
ve veco luvà 'a povere 'ncopp'a dduie sciure 'e cera,
'ncopp'a tre ffrutte 'e marmulo: 'na pèrzeca, 'na pera,
'na fica Paraviso cu' 'na vucchella 'e fuoco,
ca 'na matina, a mmaggio, se scurtecaie 'nu poco,
ca ve cadette 'a mano... V' 'o rricurdate o no?

E vuie facite chesto 'a tridece anne, a mò!
'A tridece anne, sempe! Nononna ve cumbina
'ncapo 'na pagliettella, 'ncuollo 'na mantellina
culor nucella chiara, ch'era 'na pulunese...
Quanno?... Aspettate... Quanno teniveve 'nu mese!
E sempe, a mana a mana, ve porta appriesso a essa,
comme a 'na cacciutella; quanno, 'a matina, a mmessa,
quanno, 'a parrocchia, 'a sera...

                                        Fora 'o barcone aspetta
nononno... e legge... fuma... pulezza 'na scupetta
d' 'a Guardia Naziunale... Ma... nun appena vede,
cu ll'uocchie 'a copp' 'acchiara, ca vuje mettite 'o pede
dint' 'o palazzo, corre, v'arape 'a porta... e fa:
«Quant'ato... ma quant'ato... v'avessem'aspettà?»