Paggena:'E Lluce-luce.djvu/277

Chesta paggena è stata leggiuta.


ALLERAMENTE..

Me ne vogl’ì’, cantine cantine,
pe’ copp’ ’o Campo, a Pucerïale.
Voglio campà cu’ ’e muorte pe’ vvicine...
ca nun sanno fa male.
Nu’ pparlano... ’Nu ccantano... So’ bbuone.
E so’ ’e meglie inquiline:
so’ chille ca nu’ ppavano pesone!

Là m’affitto, cu’ poche denare,
’na cammarella pe’ me surtanto.
Che mme ne ’mporta ca nun veco ’o mare?
M’abbasta ’o campusanto!
Amice? No! M’aggia fa’ chiatto e ttunno:
ll’amice, ogge, so’ rare.
Sulo... quacche cucchiere ’e Bellumunno.