Chesta paggena è stata leggiuta du' vote e mo è fernuta.
33
Core e penziero
Chello ca nun se po' dì...
Chi ha perduto 'nu figlio
po' chiagnere e strillà 'nfino a c' 'o trova.
Chi 'o mette pe' 'na via... Chi 'o dà 'o cunziglio
ca ll'accrama e lle ggiova...
Chi ha perduto 'nu figlio
po' dì: «Truvatemmillo» e po' dì comme
teneva ll'uocchie, 'e capellucce, 'o nomme...
Chi ha perduto 'a mugliera, 'a sora, 'a mamma,
po' dì: «Truvatemmella».
Po' dì comme se chiamma,
si è bruna o biundulella...
Ma chi ha perduto a una
ca troppo amava e che d' 'a soia nun era,
nun po' dì, nun po' dì: «Truvatemmella».
Nun po' dì ch'era bruna,
nun po' dì ch'era... bella...
Si nun po' dì che ll'era
mamma... sora... mugliera!
