Paggena:'E Lluce-luce.djvu/37

35

Core e penziero

Casa cuntenta!… Addò sta ’a grazzia ’e Ddio,
’a capo e mpiere ll’anno ’int’ ’a dispenza.
Addò ’nu muorzo sta p’ ’ogne gulio…
Senza fa: «Chesto è ’o ttuio… chest’ ’auto è ’o mmio»
quanno ’o marito spenne e nun ce penza.

Quann’ ’o marito, ch’è faticatore,
s’abbusca tutto chello ca lle pare…
cunforme trase ’mpuorto ’nu vapore.
E ammarcia comme fosse ’nu signore
e ghiett’ ’a pezza… pecché è ricco ’o mare.

Casa cuntenta! Addò ’ncopp’ ’a fenesta
addora ’a menta mo’ e’ ’o tiempo nn’è…
E ’ncopp’ ’o stesso marmo, affianco ’a testa,
dint’ ’a sperlunga ’na manella, lesta,
tremma pe’ mmiez’a ll’acene ’e café…

Tremma… e fa segno abbascio… int’ ’o curtile.
Comme dicesse… «Saglie a ’e ttre… dimane…»
Comm’infatte, dimane, d’ ’o Brasile
trase ’mpuorto ’nu legno mercantile…

E chesto è ’o llardo… E chesta è ’a nzogna ’mpane!…