Chesta paggena è stata leggiuta du' vote e mo è fernuta.
41
Core e penziero
A vvierno, 'o sottacapo timuniere
screvette: Nun ce vengo 'stu Natale...
Essa scennette abbascio add' 'o dulciere...
Accattaie roccocò, pasta riale...
cu' nu piacere... e cu' 'nu dispiacere...
e lle facette 'nu pacco pustale...
A Marzo... Tre ghiurnate 'e friddo e ffreva...
E 'o cardillo 'ncaiola nun cantava
pecchè ll'aco d' 'a màchina... durmeva!
— «'A cammisa... 'O lenzulo...» E se cacciava
'a dint' 'a cascia chello che sserveva...
Po'... 'a cascia... se 'nchiudette a ddoppia chiava!
Oje! Quanta musullina s'è 'ngialluta;
quanta tela d'Olanda s'è 'nguttata!...
