Chesta paggena è stata leggiuta.
77
Core e penziero
’A CIUCCULATA
— Friddo? Se more. ’St’acqua è tutta neva.
E tu staie rossa manco ’nu scartato.
Quanto vuo’ fa ca t’è turnata ’a freva?
I’ tremmo suoccio... Tocca. Sto gelato.
Mamma! Tu cuoce. Tiene ’e rrecchie rosse...
’o naso friddo... ’o ppoco ’e sopraffiato...
E pure ’a tosse?... Tiene pure ’a tosse...
Comme si’ ricaduta? Comm’è stato?
T’iva sta dint’ ’o lietto stammatina.
Cu’ ’stu friddo, te suse? E cu’ ’sta freva?
Cóccate. Dimme a ch’ora t’è schiuppata...
Ca i’ mo’ scengo... te piglio ’na cartina...
— No... Aspè... Fa friddo... Tu staie manc’ ’a neva...
Te voglio fa ’na tazza ’e ciucculata...
