Paggena:'E Lluce-luce.djvu/87

Chesta paggena è stata leggiuta.
85
Core e penziero


CUNTRARIE


Tu vuo’ durmi’ c’ ’a lampa e i’ nun ce saccio
durmi’; ma ’a lampa — è inutele! — s’appiccia
A te te piace ’a sfugliatella frolla;
a me me piace ’a sfugliatella riccia.

Tu te ’ntriche e te mpicce; i’ nun me mpaccio;
tu nun tiene ora e i’ songo tutto orario.
Tu vaie truvanno ’e cammenà p’ ’a folla,
addo’ ca i’ vaco ascianno ’o ssulitario.

Comme ce simme aunite? Va’ a capi’!
Si i’ stesso nu’ me spieco, ’nfin’a mo’,
comme ’a matina... ch’i’ dicette «si»,
chella matina... nun diciste «no!»