Chesta paggena è stata leggiuta du' vote e mo è fernuta.
Cielo! Vi' quanta e quanta luce-luce
ca luceno p' 'o lémmeto stasera...
E 'nce steva 'na vota 'nu rignante
ca teneva 'nu manto 'e ll'Uriente,
ch'era 'o cchiù ricco 'e tutte ll'ati mante.
Comme luceva! Era acussì lucente,
quagliato 'e turchenelle e ddiamante,
c' 'a ggente attuorno, tutta quanta 'a ggente,
murmuliava e sse faceva 'e ccruce:
«Comme 'stu manto luce 'e sta manera?»
Ma... luceno cchiù assaie 'sti lluce-luce
ca luceno p' 'o lémmeto stasera!...
