Chesta paggena è stata leggiuta.
94
Poesie
PALOMME
Quanno s’è ammaturata l’uva nera
e primma ’e scugnà ’e nnuce,
quanta palomme, ’a sera
’ncampagna, dint’ ’a cammera!
— marrò, paglina, d’oro, bianca e nera —
vèneno e vanno ’na serata intera
e fanno ’o giro–tondo attuorno ’a luce.
Ma chesta è luce elettrica!
Pure ’ncampagna ce l’hanno purtata!
Oi quanta e quanta nuvità, dich’i’!
’Na palomma che vò murì abbruciata
manco cchiù a ggenio suio mo pò murì!
