Paggena:'E ddoje catene.djvu/12

Chesta paggena è stata leggiuta.
7
'e ddoje catene



Perzechella — Eh! ’a lengua sbatte addò fa male ’a mola!

Papele — Addò sta?

Perzechella — è juta passianno...

Papele — ’A che parte?

Perzechella — Dinto a ’o boschetto ’e Puortece.

Papele — (aumbrannose) Dint’ ’o boschetto?

Nicola — Uah! manco si llà nce stessero l’animale feroce!

Perzechella — ’E che ve mettite appaura?

Nicola — Ma tu si crestiano o animale?

Perzechella — Chella è juta c’ ’a nepote....

Nicola — Te mettisse paura pure si va co Cristinella?

Papele —(capuzzianno) Dinto a ’o boschetto.. ’No luogo sulagno...

Perzechella — E llà che ve po’ combinà ’a puverella?

Papele — Cierte vote ’o solagno fa veni ’a vuluntà d’ ’a cumpagnia...

Perzechella — Chella non è femmena che s’ ’o mmereta sto penziero fauzo che ve site miso ’n capa.

Nicola — Vi’ che, a Napole, chella facette fa ’e nummere dinto ’a Pignasecca e le mettettero nomme Carmela Belliccose!