Papele — Chella m’è tutto! M’ è mamma, m’è sora, m’è mogliera:..
Nicola — Ma si le faje capì che po’ mettere ’o pede sparo, succede che chello che non t’ha fatto, t’ ’o ffa e t’ ’o mmierete.
Papele — Facimmo accossì: dicitencello che so’ tornato pe le portà sto mazzetto. (Dà ’no mazzetto a Nicola)
Nicola —(guardanno p’ ’a porta d’ ’a strada) Jesce!... ’A vi lloco!... Non te fa vedè!... Vattenne p’ ’o giardino...
Papele —’A voglio vede ’no poco p’ ’a senga d’ ’a porta...
Nicola — Basta che te rumpe ’e gamme!....
(’O votta pe n’ ’o fa ji’)
Papele — (sotto a porta d’ ’a cucina ) ’No poco p’ ’a senga... (Se ne va)
Nicola — Oh, grazie a Dio!
Perzechella — Pe ffa’ ’o marito a chillo nce vonno ’e furcinelle!
Nicola — Chella bellezza ’e femmena, che vottarria ’n terra ’na montagna, s’è juto a piglià chisto cippo ’e guaje!
Traseno Carmela e Cristinella d’ a porta ’e strata
Carmela — Uh, ’o Cumpare!
Cristinella — Oh, finalmente! Ve sto aspettanno co l’ova ’m pietto!
