SCENA 3.ª
d. Vicienzo e dette.
d. Vic. — (sotto la porta) Aggio ’aspettà cchiù?
Carm. — St’anema ’e Dio chiagneva e io so’ curruta a vedè ch’era succieso... Sa’, è stato don Federico ca l’ha vattuta... (strizzando l'occhio) He capito?
d. Vic. — E chesto si’ bbona a ffa’ a ’ntricarte d’ ’e fatte ’e ll’ate...
Giul. — (si lamenta sottovoce).
Carm. — Iammo, ferniscela! Na pilo ’o faie nu trave...
d. Vic. — (notando che la ragazza si lamenta) Pecchè se lagna?
Carm. — Nun t’ ’aggio ditto? L’hanno vattuta... (si avvicina a Giulietta) Te fa male assaie?
Giul. — (accenna col capo di sì, e mostra il braccio) Cca.
Carm. — (guardando) Che ’nfame scellarato! Ll’ha fatto na mulignana!
d. Vic. — Miettece nu poco d’acqua... (prende dal canterano un fiaschetto di vetro pieno d’acqua) Addò sta nu poco ’e pezza?
Carm. — (girando gli occhi attorno) E chi t’ ’o ’ddà Cca nun nce sta manco ’o ppittato!
d. Vic. — (cava dalla saccoccia il fazzoletto e lo bagna) Ecco fatto! (fasciandole il braccio) Mo nun sentarraie cchiù dulore!
Carm. — (a Giulietta) Nun ’o perdere ’o fazzuletto, si no se spara ’a duzzina...
d. Vic. — Statte attienta!... Se perde stu muccaturo ’e seta!
Carm. — Comme si’ scemo!
Giul. — (a Carmela) Donna Carmè... nun avite appaura, io nun aggio maie perzo niente...
Carm. — ’O ssaccio... tu si’ na femmenona... (scorgendo suo marito, che pensieroso guarda la ragazza) A che pienze?
