d. Vic. — (con un gran sospiro) Penzo ca quanno na povera figlia perde ’a mamma è na gran disgrazia... (s’avvicina al letto) Te siente nu poco meglio?
Giul. — Sì, don Viciè.
d. Vic. — Mo nun he ’a chiagnere cchiù... Repuòsete; e fatte nu bello suonno...
Giul. — Vurria arrepusà, ma nun pozzo...
d. Vic. — E pecche?
Giul. — ’A tosse...
Carm. — Chesta è stata tutta l’acqua ch’à pigliata... (a suo marito) ’O pate apprimma se purtava appriesso ’a mugliera, ’a rumana, p’ ’a fa girà c’ ’o piattello; ma chella bbona crestiana, annascuso, s’arrubbava sempe quacche soldo, p’ o’ dà... m’he capito? (con significato).
d. Vic. — Aggio capito...
Carm. — Nu iuorno, ca se purtaie ’a guagliona, chesta se n’addunaie, e ’o dicette a ’o pate...
Giul. — (che ha ascoltato) S’ ’e metteva dint’ ’o mantesino...
D. Vic. — Nce vo’ tanto a nduvinà ’a ventura...
Carm. — Da chillo iuorno nun se purtaie cchiù ’a mugliera, e st’anema e Dio accumpagnaie ’o paté, ’e vierno, ’e state, pe gìrà c’ ’o piattiello attuorno...
D. Vic. — (a Giulietta ) E mo pateto sta a ffa’ e guarattelle?
Giul. — Che ora s’è fatta?
D. Vie. — Nce vo poco p’àvummaria!
Giul. — Sta ’o llario ’o Castiello...
D. Vic. — E po’ addò va?
Giul. — Se ritira...
Carm. — Mo ’o vide ’e venì...
Giul. — (tossisce)
D. Vic. — (a sua moglie) Ma che tene?
Carm. — Tene ’a purmunìa!.. (sottovoce)
d. Vic. — Zitto... Sciò llà! (a Giul.) ’O miedeco t’ha vista?...
Giul. — Sì... m’ha dato chella medicina p’ ’a tosse... (indicando la boccettina che sta sul canterano) Io nun ’a voglio... è amara...
