'O cantá a ffigliola
- Tatò, mo ca pigliammo 'o Recrusorio
Avimm' 'a fà 'na capa arretenata!...
L'imm' 'a j' p' 'o canale cacatorio...
- Cumpà, hann' avuto chella sischiata!
Papele 'o Fravulese, 'o 'Nzalataro
Vulevano cantà a ffronne 'e limone !..
Cu nuie vann' a ffà dint' 'o panaro,
Jammo c' 'o punto 'e situäzzione!..
Cumpà, jammo c' 'a regola 'e scrittura,
Jammo c' 'u ppunto e virgola, cumpà!
- « Capisco bbene! » sit' ommo 'e lettura,
E v'hann 'a dà 'a deritta p' 'o cantà!..
Si site overamente cantature
Vuie nce 'nvitate a ccarn'e mmaccarune,
Rispunnite a ttinore, carugnune !..
Ca nuie cantammo c' 'o punto 'e scritture.
Senti ccà ve facimmo 'e ccose belle,
Jammo p' 'e ffeste e cantammo a ttinore,
Appartenimmo 'o Carmine a Mmaggiore,
Site 'e pupazze 'e coppo 'e cascettelle!
Jate facenno 'e scumparze p 'e feste,
Avit' 'a i´ a cantà a ffronne 'e limone...
Ve piglie a ssiche 'a pupolazzïone,
Fetiente, vuie 'e 'nzerrate 'sti feneste!..
