Chesta paggena è stata leggiuta du' vote e mo è fernuta.
— 28 —
- XVIII.
Avite ntiso o no? Erano 'a gente
ca l'avrisse vasate sott''e piere!...
Ll'ebbreca 'e mo? Nun n'è rummaso niente!..
Mo, tuttuquante, songo cavaliere!...
Valle a cuntà!... Cùntale a ciente a ciente,
e arrìvece sultanto c''o penziere!...
Fummo, mpieche, denare... e po', va siente!
Vanno a fernì mmiezo 'e carrubbeniere!
Pigliate 'o fatto r''a Banca Rumana!...
Bastava ca Linardo accumparesse,
ncopp''o cavallo, cu na langia mmana!
Sulo a sentì ll'addore... 'e pesce fritto,
accumminciava a dispenzà cunesse,
e nce 'a tagliava, 'a capa, a stu Giulitto!
