Chesta paggena è stata leggiuta du' vote e mo è fernuta.
- — 45 —
- XXXV.
— Limone, acqua, acquaiuolo!. — Viene 'a ccà,
ramme na giarra semprice! — Zi-Tò!
'O macanzese po'.... Se fa acchiappà?...
— Nun ce 'o ddicite!... — Comme masto Ntuò,
e site vuie!... Ma nun se fa afferrà,
Gano 'e Macanza! Che ve pare, mo'!
'A sape tanto longa!... Scapparrà!...
— Gniernò! — Gnorsì! — Embè, Linardo, po'?
— 'O spassatiempo! — Rì cientè 'e semmente...
Addonca, ve ricevo: 'o palatino
nun ll'assecuta? Nun l'arriva, che?
Vuò fa jì na scummesa? Tiene mente!
Guè ma vì comm'è ttuosto stu Peppino!
L'arrivarrà, Linardo, siente a mme!
