Amalia — Vattenne fore.
Felice — Vattenne dint’’a cucina.
Rosella — Eccome ccà, me ne vaco. Si aggio parlato è stato pe bene vuosto. (Che me ne preme a me, nun fa che s’accidene tutt’’e duje) (via pel fondo. Fel. ed Amalia: si sono seduti a tavola, l’uno di fronte a l’altra. Pausa. Si guardano. Lazzi).
Amalia — (Vuò sapè la verità… mo mangio, si no me faccio secca secca, io moro, e chillo se ne piglia a n’ata! No chesto maie, nun nce l’aggia dà per vinta. (si volta per mangiare facendo molto rumore con i piatti e le forchette).
Felice (dopo pausa, guarda 2 o 3 volte i piatti) — (Mo mangio pur io!… E si no chella se combina tutte cosa!) (senza avvedersene, mette la mutanda alla gola, come la salvietta). L’ò messo io ’o scarfalietto dentro al letto?
Amalia — E che l’ò messo io?
Felice — Va bene, questo poi si vedrà. (tutti e due parlando a sogg: prendono le forchette, ed insieme afferrano una sola fetta di carne. Pausa. Si guardano). Ma vedete che stongo appezzanno, e lasciateme appezzà!
Amalia — E io pure steva appezzanno.
Felice — Ma a me, me pare, c’appizza prima il marito.
Amalia — No, no, mio caro, sei in errore, appizza prima la moglie.
Felice — Ma niente affatto, prima il marito.
Amalia — No, prima la moglie. Ma già, non è questo e non è quello, è che mi vuoi contrariare in tutto. Tu àie visto che io steva mangianno, e àje ditto: Io a chesta nun l’aggia fa mangià, la debbo torturare, la debbo far soffrire!… Non è vero? Aje detto questo? Sì? E va bene!… Nun mangiamme chiù. E fatto. (lascia la forchetta e gli volta le spalle).
Felice (pausa) — E nemmeno io voglio mangiare! Stammece diune comm’a duje cane (lascia la forchetta).
Amalia — Già, questa è l’educazione che avete ricevuto da vostro padre… nu baccalajuolo!
Felice — Mio padre non era baccalajuolo, era negoziante ’e baccalà. Capite?
Amalia — E non è l’istessa cosa?
Felice — Ricordatevi invece di vostra madre, ch’era na purtusara, se pigliava 5 soldi ’o buco!
Amalia — Mammema! (alzandosi). Guè nun parlà ’e mammema sà, che nce ncuitammo seriamente!
