Felice — Stai in errore, mia cara, prima era tua, ma mo è d’’a mia.
Amalia — Chesto ’o vedimmo a n’atu poco. Rosè, vattenne.
Rosella — Ma vedite…
Amalia — Vattenne, t’aggio ditto, si no te mengo na cosa nfaccia.
Rosella — Eccome ccà. (via)
Felice — (Te mengo na cosa nfaccia, e io ccà che so, n’attaccapanno).
Amalia — Aie ditto che la casa era roba toia?
Felice — Se capisce, e io per la casa ti ò sposata!
Amalia — Ah! neh? E va buono, chesto a n’atu poco ’o vedimmo, si è roba toia, o è roba mia. Capirai che questa è una cosa che la deciderà il tribunale, non la puoi decidere tu certamente, che sei un cretino, na bestia! No, me piace l’idea: La casa è roba mia!… Insomma tu sei il proprietario?… Ma… proprietario di che cosa sei? Di baccalà forse? Tu puzzi di baccalà che appesti!
Felice — Ma che tengo ’a scella ’e baccalà dint’a sacca!?
Amalia — Vo fa l’ommo, se mette in tuono… La casa è roba soia. Mo, mo, a n’atu poco vedimmo ’e chi è. Mo, mo, (via 1ª. a s.).
Felice — Insomma essa ordina, essa comanda, e io m aggia sta zitto.
Michele (levando la tavola dal mezzo la mette in fondo a s.). Ah! D. Felì, che facisteve, ve isteve a nzurà, stiveve accussì bello.
Felice — Ti ricordi? Ti ricordi, amico mio che vita felice era la mia?… Te ricuorde… ’e chisti tiempe…
Michele (dando la voce) — Fattenne n’ata magnata.
Felice — Che cosa?
Michele — ’E fiche trujane?
Felice — Nun pazzià, pecchè chisto nun è tiempo ’e pazzià. Ti ricordi quei divertimenti, teatri, cene, feste, e mo quann’ ’e pruove n’ata vota?
Michele — So chello d’o ciardeniello overo!
Felice — Dalle dà; io dico quann’’e pruove n’ata vota quei divertimenti.
Michele — E che buò pruvà chiù.
Felice — Si, ma mo è finito tutto. Ho mandato a chiamare l'avvocato, e me voglio spartere assolutamente, assolutamente. (via 1. a d.).