Rosina — Eccome ccà.
Felice — Chesta è na bona testimone, sape tutt’’e fatte mieje! (piano a Rosina). Rusì, ricordate che te facette a vesta nova ’o nomme tujo!
Rosina (s’avvicina a Raffaele) — (Va buono).
Raffaele (sorridente) — Voi siete la serva di D. Felice?
Rosina — Sissignore.
Raffaele — Bravo! A me me piacene tanto le serve.
Felice — (Chisto, a stu Presidente le piacene tutte quante).
Raffaele — Se mai ve ne andate da D. Felice, fatemelo sapere, perchè vi prendo al mio servizio.
Felice — (Va a servizio cu l’urzo!).
Raffaele — Io tengo 7 figlie femmene, ho bisogno di un’altra cameriera.
Felice — (Chisto tene ’o serraglio a casa!)
Raffaele — Bè!... Giurate di dire la verità, tutta la verità, nient’altro che la verità.
Rosina — Lo giuro!
Gaetano — Spiritosa.
Felice — Io ve l’aggio ditto ca è bona.
Raffaele — Sapete niente se i vostri padroni si contrastavano mai?
Rosina — Sempe, ogni minuto secondo!
Felice — Bene! (dando un colpo sul cappello di Gaetano che aveva sulle gambe).
Gaetano — Puozze possà ’nu guaio! M’ha rovinato ’o cappiello!
Felice — Abbiate pazienza, D. Gaetà, è stato pe fa na mossa ’e piacere.
Gaetano — E che piacere, scusate!... Sia fatta la volontà d’’o Cielo!
Raffaele (ai 2) — Stu mormorio, stu mormorio! Ah!
Felice — (È trasuto ’a vacca dint’’o palazzo, pigliate ’o bicchiere).
Raffaele — E sapete niente dell’affare dello scaldaletto?
Rosina — No, d’’o scarfalietto nun ne saccio niente.
Raffaele — Chi era la causa del contrasto, il marito o la moglie?
Rosina — Nun ’o saccio signò, io me trovavo sempe quanno se stevene appiccecanno, nun saccio a chi preveneva.
Raffaele — Va bene, sedetevi, che poi sarete richiamata. E ricordatevi, se ve ne andate da D. Felice fatemelo sapere.