ATTO PRIMO
Camera da pranzo in casa di Felice. Porta in fondo e 2 laterali. Una finestra 2ª a destra dello spettatore. In fondo a destra una credenza con piatti, bicchieri, posate ed un libro. A sinistra in fondo una cristalliera. Nel mezzo della scena una tavola apparecchiata per due. Sedie ecc. ecc.
SCENA I.
Rosella, poi Michele.
Rosella (dal fondo) — Nun nce sta nisciuno. Doppo la nuttata ’e stanotte starranno durmenno ancora. Mamma mia e che gente, manco ’a notte stanno cujeto.
Michele (dalla scena) — Guè, Rusè, che d’è?
Rosella — So trasuta pe doje cose, primma, pe di ’o signore che stammatina è venuta na persona che se vo affittà ’a casa ’o primmo piano, e po vuleva sapè comm’è ghiuto a fenì l’appicceco ’e stanotte.
Michele – È ghiuto a fenì, che doppo tanta strille, doppo tante allucche, ’a mugliera s’è addurrmuta ncopp’a na pultrona, e D. Felice ’o marito s’è addurrmuto nterra!
Rosella — Vuje vedite che gente stravagante. Ma pecchè fanno sempe quistione?
Michele — E pecchè… pecchè D. Felice nun s’aveva nzurà accussi priesto, e pigliarse na capricciosa, na pazza comm’a chella! Tutte cosa le da fastidio, pe niente s’attacca ’e nierve. Le vularria fa attaccà io ’e nierve!
Rosella — Ma tu staie ’a paricchie tiempo a servì cu D. Felice?
