Chesta paggena è stata leggiuta du' vote e mo è fernuta.
— 12 —
— Ma guardate, ma sentite,
russo russo io rispunnette,
quann’è abbascio, si nne parlo,
io nne parlo cu rispette…
’O Signore me guardava.
— Piccerì, tu si ttenace!
Vi che bella faccia ’e cuorno!
Piccerì, tu me piace!
’Npertinente comm’a chisto
mai nisciuno è capitato!
Io so sempe ’o stesso viecchio,
ma lu munno s’è cagnato!
E redeva chiano chiano,
bbuono bbuono, ’o vicchiariello;
e allisciannose ’o barbone,
— Iammo, miettete ’o cappiello,
me dicette. — Si vvenuto?
Quacche ccosa ’o bbuò’ vedè?
E va bbene, iammoncenne,
viene sempe appriesso a mme.
