Chesta paggena è stata leggiuta du' vote e mo è fernuta.
— 15 —
Nuie mancammo ’e tanta cose!
Nuie marciammo all’uso antico.
Manco ’o ggasse è miso ancora…
Siente e vide che te dico!
’Ncunfidenzia, si nun fosse
pe sti quatto stelletelle,
uno ccà starria suggetto
d’appicciarse ’e llucernelle.
Quanta vote ll’aggio ditto:
“Chisto è ssécolo ’e prugresso!
Si facessemo quaccosa?„
Nonzignore! Sempe ’o stesso!
Sempe ll’angele cu ’e scelle
senza cuorpo e senza niente;
sempe ’e nnuvole, e stu ncienzo
ca nce dà chisti fumiente!
Àggio fatto nu pruggetto
pe nu muorzo ’e gallaria…
Manco tanto aggio spuntato!
stammo arreto, gioia mia!
