Ros. Oh! oh! non se parla maje d’annore.
Car. Cca se parla de… ma lassatame sta zitto, perchè mme volite fa chiacchiarià?
Luc. No, tu haje da dicere che ssaje?
Car. La siè Lucrezia vo bene a ppapà mio: chillo è bidovo, tene schitto sto spruccolillo, (indicando sè stesso) e essa perzò… vuje mo perchè mme volite fa parla?… io sonc’ommo… pò se dice che n’ommo fa no marrone.
Ros. (con asprezza) Te voglio dà tanta schiaffe si n’auta vota dice stì pparole, bricconciello! male penzante!
Luc. (tra sè) (E bà che dice buscia!)
Ros. (a Carluccio) Alò! va te mpara lo ccompetà, va scrive li mmazzarelle che t’ha rummase assignate pàteto. Vedite no poco sta virgola dell’uommene quanta chiàcchiere che tiene!. (con impeto) e stammatina senza marenna.
Car. Sè, solamente stammatina? è no mese e ccinco juorne che sto ffacenno la cura.
Ros. È lo vero, fuje pe ccastigo, non m’arricordo chè ffaciste; ma mo pe cchesto ch’è ditto, n’auto mese senza marenna.
Car. E già, tu chesta scusa ive trovanno. Quanno è ppassato st’auto mese, farraggio n’auta piccola mpertinenzia, e se nne zompano duje aute mise pe ccoppa, e accossì strada facenno levammo ll’uso de la marenna. Si mme vene ncapo, mme presento a la signora co la maschera, e lle dico ca quanno so ggruosso mme la sposo. (entra)
Ros. Brutto principio! sto guaglione se cresce na scorza de caso cellese, ma proprio
