de chelle vì; tene cchiù ssale isso dinto a la cocozza che non ne tengo io.
SCENA IV.
Marianna con biancheria e dette.
Mar. Lucrè, va porta sta rroba a Madama Addruat, ffatte consignà pure li denare.
Luc. Eccome cca. (avviandosi)
Ros. (con cuore) Viene cca bella mia, damme no vaso. Io lo ssaccio ca non sì de cattivo core, ma vì, sti sparate, st’asciute da palo nfrasca non so decente mmocca a na figliola, mmocca a na gentildonna… perchè la stiratrice vene a essere na meza-gentirdonna.
Luc. Sì, che ba co lo canisto mmano… siè Rosì, e non la dì cchiù ggrossa! (via)
Ros. Agge pacienza Mariannina mia, tutte doje tenite duje carattere; tu accossì soda, e ssoreta accossì mprudente: io mo sa quanto nciavarria puosto, e…
Mar. Lo ssaccio Rosì, lo ssaccio: agge pacienza, sì ttanto bona moncevò…
Ros. Parlammo nfra de nuje, chella tene quacche ppenziero pe ffratemo vidovo…
Mar. (tra sè) (E io lo tenco chiù dd’essa.) Vuje che gghiate penzanno?
Ros. No, la cosa non sarrìa cattiva, chillo è no buono giovane, tene na trentina d’anne; ma nc’è na circostanza, che vene perseguitato da na cierta scajenza e ccampa lo Cielo sa comme… essa manco tene dote, e che bonora? farriano la razza de li pezziente. Ecco cca, io faccio l’ammore co
