Mau. Dico che mille ducale a lo juorno sarria na rènneta strabocchevola.
Mar. Dicite la verità si Maurì. Si fosse vera sta notizia, nc’arresecarrisseve?
Mau. Oh! ve pare, io mme pigliarria no mostro, e perchè? per sacrificare i miei giorni e piangere eternamente (tra sè) (la mia paccariazione... fosse vera la cosa!...) (speranzandosi)
Mar. Vuje pensate propriamente comme penzo io: vedite, mme contentarria cchiù dde pigliarme no sfrantummato e ssimpatico giovene, che no prencepe ricco e brutto.
Mau. (So belle chiàcchiere, fosse vera la notizia de la dama co la capo de morta, sa comme mme derruparria...)
SCENA VI.
Carluccio e detti.
Car. Ne papà? ve pare crianza chesta de lassà no povero figlio senza marenna: ah? risponniteme; papà ve site fatto no scrianzatiello.
Mau. Ah, ah, ah! te pare mo mm’avria da piglià collera? ma voglio ridere: (con tuono scherzevole) nennillo de papà, tu da quanto tiempo non magne?
Car. Da jersera.
Mau. E ppapà tujo da jere mmatina: ed il pranzo che feci fuje na prubbeca d’aulive, na meza de seje, e no tornese de rapeste.
Car. Benedica papà! avite tenuta tavola?
Mau. E tu?
Car. Io magnaje co zziema na menesta de cocozza de spagna.