Chesta paggena è stata leggiuta du' vote e mo è fernuta.
— 16 —
va pe ggiovane co Ccuosemo lo mastrodascio che sta all’Aria Catalana…
Mau. Stive? e non ce siaje?
Pul. Siente mo. Lo principale ha ditto sempe ca io faccio male servizie, e io, te juro si Maurì, aggio fatto no stùrio pe non ne fa maje. Stammatina mm’ave accattato no pare de scarpe nove dicennome cheste pparole. «Guè, li bì cheste? so nnove nove, miettatelle a lo pede, e ba ammolà li fierre abbascio a lo Mercato, Vi ca io t’avviso, che ssi li ppuorte nchiaccate de lota, te storzello la noce de lo cuollo.» Maurizio mio, so asciuto co na paura ncuorpo ma vi pròpete majateca. La combinazione ha fatto venì a cchiovere. Che avisse fatto? ll'uneco mezzo era chisto pe non me sporcà li scarpe; aggio chiammato no seggettaro, e mme so ppuosto nseggia. Frate mio, quanno steva pe mm’accostà a la poteca e ch’è ntiso!… La zagrellara de rimpetto: «Currite, currite, vene Pulicenella nseggia, se sarrà rotta na gamma.» Lo solachianiello «No no, s’è aperta la capo.» Lo fruttajuolo «lle sarrà benuto na commertazione e lo portano a lo spitale».. Nzomma è ccorruto lo principale tutto sbattuto… «Ch’è stato, ch’è stato Pulicenè?» Io aggio cacciato la capo da lo sportiello… «Niente signure mieje, non ve spaventate perchè io sto buono.» E pperchè sì benuto nseggia?» — «Perchè? lo bolite sapè? te, vi comme so ghiuriziuso» ll’aggio mostrato li scarpe, «Pe non li nchiaccà mme ll’aggio levate da lo pede e sso benuto nseggia.» — Uh Maurizio mio, e ch’è visto!