Mau. É mpossibile.
Pul. Chesta è ne cosa tanto facile. Sì fossero 10 carrine a lo juorno de rènneta? sarriano…
Mau. 30 ducate a lo mese, e ssaccio che pe sta rènneta, nce vo lo capitale de 7 milia e spare ducate all’anno.
Pul. Oh! vi comme va bello. Mortipricammo 7 milia pe 70 milia — (facendosi il conto) So 7, via 7,… 150, e 7, che ffanno 77: lèvano lo sparo e rrestano 47: 47, sommate pe 12 ogne anno, so 7 carrine e mmiezo a lo juorno: lèvance li rotte e mmiettece li sane, so quattomilia ducate a lo juorno. Quatto milia pe cquatto milia formano 190 milia, 190 milia pe 190 milia, sonco 820 milia: somma 820 milia co 820 milia, sònco ntutto; tridece miliune ottociento ottanta milia, novociento cinquantaquatto ducate e nnovecalle.
Mau. Bù.
Car. Mme pare na bona voncola de pertosa.
Pul. Chisto è ccunto chiaro signure mieje. Li prubbecaziune so ffatte, la mano è quase data, aggio accommenzato a esigere lo denaro, e già sto penzanno d’aprì na gran fabbrica de palicche e ccerotte pe li calle.
Car. Ah, ah, ah!
Mau. Levammo li ppazzie Pulecenè.
Pul. Pazzie! chesta so berità lampante e straseculiante.
Mau. Ma tu ll’è vista a sta signora?
Pul. No ancora…
Car. Uh che te vencà no cancaro!
Pul. A te e a ppateto, ommacaro ve lo spartite da buon compagno.