Car. Non l’è visto ancora, e già dice che sso ffatte li prubbecaziune.
Pul. Ncapo a mme s’è fatto tutto. Ecco cca, lo fatto è chiaro. Tutta Napole ha dda ire llà pe concorzo. La nota se fa accossì; primmo li forastiere, e ppo li paisane; io so forastiero perchè sono estero de la Cerra, e aggio d’ave afforza la preferenza. Maurizio mio vì comme va bello: mme presento a mmadama. « Signora, vi piace il mio frontespizio? » (imitando una voce di donna) « Sissignore siete penetrante ed impaparacchiabile: questa è la mia granfa siamo marito e mmoglie. Alò smontate in carozza, facciamoci smicciare della socievole societracchia »,.. Nzorama s’è ffatto lo matrimmonio, so rricco, e si vuò no paro de migliare de ducate mprièstete piglia lo sacchetiello ca simmo leste.
Car. Ah, ah, ah! Gnò, mo nce vo veramente lo rridere.
Mau. Ridere! cca nce vonno li ttofe!.
SCENA VIII.
Anselmo usciere e detti.
Ans. Fatemi grazia, chi è lo si Maurizio Scapece?
Mau. Io a servirvi.
Ans. Favorite no momento fuori, vi è una persona che vi domanda.
Mau. Eccomi, (avviandosi)
Pul. (arrestandolo) Aspetta. (poi si dirige ad Anselmo con modi villani) E tu carognone! jesce fora.
