me de fatte: ogge a 23 ore s’è bbenuto a ppiglià Maurizio, e so ghiute nzieme co Pulicenella a ccombinà lo niozio.
Car. Faccio na piccola rifressione io che sso piccerillo. Chi sta cchiù ddisperato Papà mio, o D. Andrea? Papà si no sbaglio. E non potarrìa essere che isso farrià lo niozio?
Mar. (entrando in sospetto) (Uh bonora! è lo vero... ah! ca mme sento rosecà la rezza!)
Luc. Dice buono Càrluccio: so gghiute Pulicenella, D. Andrea e Maurizio; perchè s’ha dda dicere che ssulo D. Andrea è gghiuto pe cchillo fine?
Car. Che? site ciucce tutte tre?
Ros. Comme parle ne, scrianzato!
Car. E non ne pozzo fa a lo mmanco, agge pacienza, perciò siamo uomini.
Mar. (con rabbia repressa dice tra sè) (Io... io subeto ne li ccaccio da la casa mia!
Ros. (osservando Marianna) Mariannì, chedè? tu cagne de colore?
Car. (tra sè) (Bella! mo vene lo capestuòteco a cchest’auta!)
Mar. Niente... no giramento de capo...
Luc. (tra sè) (Uh! bonora! te: na parola jettata mmiezo a la via ha fatto cadè no palazzo.)
Ros. (a Mar.) Eh! l’affare non è gghiusto, tu bobba tiene ncuorpo.
Mar. Siè Rusì, che ddicite?.. ah! ne... che sospettate...
Car. (tra sè) (Aggio capito va; ll’amica è ccotta pe ppatemo! (con presunzione) Ma si nce vonno gli uomini.